Manganka iti Nateng!

BABAEN TI MANNURAT TI AGRIINGKAYO! IDIAY BRAZIL

“Napait.” “Saan a naimas.” “Diak pay nangnangan iti kastoy.”

DAGITOY ti sumagmamano laeng kadagiti rason nga adu ti madi a mangan iti nateng. Sika ngay? Mangmanganka kadi iti nateng iti kada aldaw? Naginterbiu ti Agriingkayo! tapno maammuan no apay a kayat ti dadduma a tattao ti nateng ken no apay a di kayat ti dadduma.

Imbaga dagidiay mangmangan iti nateng nga insuro kadakuada idi dagiti dadakkelda ti pateg ti pannangan iti nateng, bukbukel, ken prutas. Maisupadi iti dayta, adu kadagidiay di mayat iti nateng ti di nairuam a mangan kadagitoy idi ubbingda pay. Kaykayatda ketdi ti saramsam. Ngem uray dagitoy, umanamongda a napateg ti nateng tapno mataginayon ti kinasalun-at.

Dakayo a nagannak, suruanyo dagiti annakyo a mangan iti nateng! Kasano? Isingasing ti Facts for Life, nga impablaak ti United Nations Children’s Fund nga iti di kumurang a maminsan iti kada aldaw kalpasan ti panagpasuso, dagiti ubbing nga agarup innem a bulan masapul a mapakandan iti nateng a nalambong, naukisan, ken nalusak. No ad-adu a kita ti taraon ti maipakan, ad-adda a pagimbagan ti ubing dayta. Kuna ni Dr. Vagner Lapate, maysa a taga Brazil nga espesialista ti ubbing, a nupay gatas ti kangrunaan a taraon ti ubing iti umuna a dua a tawen, ti panangpakan iti dadduma a taraon “paregtaenna ti ubing a mangtakuat kadagiti baro a raman.”

Iti libro a Medicina​—Mitos y Verdades (Medicine​—Myths and Truths), isingasing ni Carla Leonel a ti bassit a tubbog ti naranghita, napalet a tubbog ti prutas wenno puree (kas iti saba, mansanas, ken papaya) mabalin a maipainum, mapakan iti cereal ken mapaigup iti digo ti nateng sakbay pay ti naibaga nga immunan nga edadna. Siempre, tangay agduduma ti opinion maipapan iti daytoy, nainsiriban no agkonsultaka iti pediatrician-mo.