Manipud Kadagiti Agbasbasa
Kinasalun-at Ti kaadu ti liwliwa ken pammaregta a nagun-odak iti serye a “Kinasalun-at ti Amin—Posible Kadi?” (Hunio 8, 2001) ket di matukod. Adda sakit ti isipko, ket pinanggepko idin ti agpakamatay. Inaldaw a pampanunotek, ‘Kasano a madaerak ti agmalem?’ Daytoy a magasin ti nangipalagip kaniak iti kari ni Jehova iti Apocalipsis 21:4 a ‘punasennanto ti amin a lua kadagiti matatayo.’
C. T., Japan
Agyamanak kadagiti nagsayaat nga artikuloyo. Kas doktor iti naturopathy [sistema ti panangagas a di agusar iti droga ken operasion no di ket dagiti natural a banag (kas iti angin, danum, ken lawag ti init) ken pisikal a pamay-an kas iti panangmanipular ken panangagas babaen ti koriente], segseggaak ti aldaw inton awanen ti sakit. Iti kasta, makapaginanaakton manipud iti trabahok ken makapagtalonakton—ti maikadua a paboritok a trabaho!
B. C., Estados Unidos
Panagdaniw Naragsakanak idi nabasak ti artikuloyo a “Panangiladawan Babaen ti Sasao.” (Hunio 8, 2001) Nanipud idi nagretiroak, nairuamakon nga agsurat iti daniw a mangparparagsak kaniak ken pakagun-odak iti pannakapnek.
J. B., Britania
Sipud kinaubingko, kaay-ayok ti agsurat, isu a gapu iti dayta, natakuatak ti arte ti panagdaniw. Pagyamanan iti panangdakamatyo a ti “napintas a daniw ket saan a pinutar ti narabaw a panunot.” Patien ti adu a tattao a ti panagsurat iti daniw ket pagilasinan ti kinakapuy. Daytoy a kita ti panagsurat ti maysa kadagiti kapintasan, ket maragsakanak ta kasta met ti panangmatmat ti Namarsua kadatayo.
M. T., Chile
Dagiti Katedral Nagustuak ti artikulo a “Dagiti Katedral—Monumento iti Dios Wenno iti Tao?” (Hunio 8, 2001) Ngem saan kadi nga agar-aramid met dagiti Saksi ni Jehova iti dadakkel a Kingdom Hall ken Assembly Hall?
R. B., Estados Unidos
Kastoy ti sungbat ti “Agriingkayo!”: Binabalawmi ti pannakaaramid dagiti katedral saan laeng a gapu ta nagdadakkelda no di ket ti nangtignay iti pannakaaramidda ket ti inawagan ti maysa a historiador a ti “kinatangsit” dagiti panguluen ti relihion. Kasta met a ti panangpondo kadagitoy a nagdadakkel a pasdek ket masansan a nangpataud iti nakaro a panagrigat ti parokia. Iti kasumbangirna, dagiti Kingdom Hall ken Assembly Hall ket nanumo a pasdek a di naaramid tapno maidayaw ti siasinoman a tattao. Imbes ketdi, mausar dagitoy kas lugar a pagdaydayawan. Maponduan dagitoy a pasdek babaen ti boluntario a kontribusion ken saanda a makapadagsen iti pinansial ti siasinoman.
Dagiti Simotsimot Agtawenak iti 14, ket naay-ayoak a nangbasa iti artikulo a “Ti Napintas a Simotsimot.” (Hunio 8, 2001) Sangkapanunotko idi a makapaseggar a kitaen dagiti simotsimot, ngem idi nabasak daytoy nga artikulo, agpanunotakton a naimbag sakbay a patayek ida!
D. S., Estados Unidos
Bayat a basbasaek daytoy nga artikulo, adda simotsimot a nagdisso iti asideg dagiti sakak. Idi pay laeng a nakakitaak iti nakapimpintas a simotsimot! Talaga a nakaskasdaaw ti nakaparsuaan, ket no paliiwentayo dayta, mabalin nga umuneg ti panagayattayo iti Dios.
G. P., Italia
Gapu ta diak idi ap-apresiaren ti kinapintas ken kinanadumaduma dagiti simotsimot nga inaramid ni Jehova, impagarupko no saanda a makapainteres nga insekto. Di nagbayag kalpasan a nabasak ti artikulo, sibsibugak dagiti mulak idi adda immasideg a napintas a simotsimot. Agyamanak ken Jehova gapu kadagiti pinarsuana ken gapu iti artikulo a nangparegta kaniak nga agbalin nga ad-adda a managpaliiw.
C. S., Estados Unidos
Red Tide Kas maysa a maestra, isursurok ti maysa nga asignatura a nainaig iti umiso a panangtaming ken panangtarawidwid kadagiti gameng ti kostatayo. Dandani insardengkon ti agbirok iti artikulo a nangilawlawag a naimbag maipapan iti red tide. Tinulongannak ti artikulo a “No Lumabaga ti Danum” (Hunio 8, 2001) a mangrisut iti problema. Pagyamanan unay iti panangipablaakyo iti dayta.
J.O.P., Pilipinas