Umayyo Denggen ti Palawag Publiko a
“Ti Buya Daytoy a Lubong Agbaliwbaliw”
NARIRIBUK ITAN DAGITI PANAWEN. Kasla nagpartak ti panagsasaruno dagiti makapakullayaw a pasamak ditoy lubong. Masmasdaaw ken mariribukankayo aya ta kaslattay nagpartak ti panagbalbaliw ti amin a banag iti aglawlawyo?
Mabasa iti Biblia daytoy masinunuo a kapaliiwan maipapan kadagiti aramid ti tattao: “Ti buya daytoy a lubong agbaliwbaliw.” (1 Corinto 7:31) Ipadpadis idi ti nangisurat kadagita a sasao a ni apostol Pablo, dagiti pasamak iti lubong kadagiti agkarabaliw nga eksena iti entablado ti maysa a teatro. Iti intero a historia iti sangalubongan nga entablado, nagbiag ken pimmusayen dagiti panguluen iti lubong ken dagiti tattao a nangipasdek kadagiti uso. Ti baro sukatanna ti daan ket kanayon a kasta ti mapasamak. Ngem iti kaaldawantayo—nangruna idi nagpateg a tawen ti 1914—kasla ad-adda a pimmartak dayta a kasasaad.
Ngem ammoyo kadin a ti kaipapanan dagitoy a riribuk iti lubong—uray pay dagiti kabaruan—ket naimbag met a damag para iti sangatauan? Wen, kinapudnona, dagita ti mangpaneknek nga asidegen a sumayaat ti buya ti lubong. Nabayagen nga impadto ti Biblia dagiti nakaro a rigat iti kaaldawantayo. Ilawlawagna met nga amin dagita a riribuk ket pangrugian laeng ti kadakkelan a panagbalbaliw a mangapektar iti natauan a kagimongan. Kinaagpaysuanna, daytoy umad-adanin a dakkel a panagbalbaliw, nupay mabalin a nakabutbuteng, isut’ kasayaatan a damag kadagiti nasayaat ti panagpuspusoda a tattao iti amin a lugar. Ti buya daytoy a lubong ket agbalinto a natalna ken naragsak para iti natauan a pamilia.
Kayatyo kadi a maammuan ti ad-adu pay maipapan kadagitoy a panagbalbaliw ken no kasano ti panangilawlawag ti Biblia maipapan kadagitoy? Naimpusuan nga aw-awisendakayo a tumabuno iti palawag publiko a napauluan, “Ti Buya Daytoy a Lubong Agbaliwbaliw,” kadagiti kombension distrito dagiti Saksi ni Jehova a mangrugi iti sumaganad a bulan. Maangay dagiti kombension iti ginasut a lugar iti intero a lubong. Tapno maammuanyo ti kaasitgan a kombension iti lugaryo, pangngaasiyo ta makiumankayo kadagiti Saksi ni Jehova iti lugaryo.
[Ladawan iti panid 32]
Maysa a bomba atomika ti nangdadael iti Hiroshima, 1945
[Credit Line]
USAF photo
[Ladawan iti panid 32]
Narba ti Berlin Wall, 1989
[Ladawan iti panid 32]
Panangatake dagiti terorista iti World Trade Center idiay New York, 2001
[Credit Line]
AP Photo/Lionel Cironneau