‘Magasin a Supsuportaran ti Dios’

MAYSA a lalaki a makipagad-adal iti Biblia kadagiti Saksi ni Jehova idiay Nigeria ti timmabuno iti seminar nga inorganisar ti Inter-African Committee on Women and Children. Nangitugot iti dua a nabiit pay a kopia ti Agriingkayo!

Iti umuna nga aldaw ti seminar, napaliiw ti lalaki a ti ispiker ket agus-usar kadagiti punto manipud iti maysa kadagiti magasin nga intugotna. Ti serye dagiti artikulo a nailanad iti akkub ket napauluan iti “Makapnek Unay ti Biag.” (Oktubre 22, 2001) Dagus nga inruarna ti kopiana tapno sumurot iti pannakaibasana.

Kamalmanna, nakita ti abogado nga agpalawag iti sumuno nga aldaw ti akkub ti sabali pay a ruar ti Agriingkayo! nga intugot ti estudiante iti Biblia. Napauluan dayta iti “Tulong Kadagiti Makabkabil a Babbai.” Kayat ti abogado a buloden dayta. Karabiyanna, dinadaelna ti immuna a palawag nga insaganana ket nangisagana iti baro a palawag a naibatay kadagiti artikulo ti Agriingkayo! Iti simmaganad nga aldaw, bayat nga agpalpalawag ti abogado, inruar ti babai a nakatugaw iti intar a nagtugawan ti estudiante iti Biblia ti isyu ti Agriingkayo! sa simmurot iti pannakaibasana.

Dakkel ti naitulong ti estudiante iti Biblia kadagiti napagsasaritaan iti seminar gapu iti panangbasana kadagiti artikulo ti Agriingkayo! Napaliiwna nga ‘awan duadua a daytoy a magasin ket supsuportaran ti Dios.’

Kayatmo kadi ti kanayon a maaddaan iti kastoy a pagbasaan iti pagtaengam? Kiddawem iti maysa kadagiti Saksi ni Jehova a mangitulod kenka iti kopia.