Naranraniag a Masakbayan?

Ti masakbayan ket maysa a makapainteres unay a tema. Siasino kadatayo ti madi a mangammo no anianto ti aramidentayo iti sumaganad a bulan, sumaganad a tawen, wenno uray pay sangapulo a tawen manipud ita? Iti nalawlawa pay ti saklawenna a panangusig, anianto ti kasasaad ti lubong iti sumaganad a 10, 20, wenno 30 a tawen?

POSITIBO aya ti panangmatmatmo iti masakbayan? Nagadu a tattao ti kasta, ket mabalin a dua a grupo dagitoy: dagidiay agkuna nga adda natibker a pakaibasaran ti panamatida a sumayaatto ti bambanag ken dagidiay mamati laeng nga adda naraniag a masakbayan gapu ta makapaupay nga amirisen ti dadduma a posibilidad.

Siempre, saan a mamati ti dadduma a tattao nga adda naragsak a masakbayan. Karaman kadagitoy dagiti mangipadpadto iti didigra a kasla maragsakanda a mangipakaammo nga inton kamaudiananna, matalipuposto a naan-anay ti planeta a Daga. Sigun iti panangmatmatda iti masakbayan, manmanonto laeng ti maisalakan, no adda man.

Ania ti pampanunotem maipapan iti masakbayan? Masirmatam aya a nalidem ken naan-anay a nadadael wenno natalna ken natalged dayta? No namnamaem a natalged, nakaibasaran ngay ti namnamam​—iti arapaap laeng wenno natibker nga ebidensia?

Saan a kas kadagiti mangipadpadto iti nalidem ken nadadael a masakbayan, dagiti agipabpablaak iti Agriingkayo! saanda a patien a mapukawto ti sangatauan. Imbes ketdi, mangipaay ti Biblia iti natibker a pakaibasaran ti panamati a sumungsungaden ti kasayaatan a panawen.

[Picture Credit Line iti panid 5]

Rinetrato ti U.S. Department of Energy