“Nagsayaat nga Usaren iti Panangisuro!”

Dayta ti insurat ti maysa nga amin-tiempo a ministro dagiti Saksi ni Jehova idiay Panama maipapan iti Ania a Talaga ti Isursuro ti Biblia? Maysa dayta a libro nga addaan iti nagpipintas a ladawan ken 224 a panid a maus-usar itan iti panagadal iti Biblia iti adu a lugar. Kastoy ti insuratna: “Makakombinsir unay ken nagsayaat ti kinaababa ken kinaumisona. Magutugotka nga agsukimat a dagus gapu iti baro a wagas ti panangusarna kadagiti reperensia ken apendise.”

Kinuna met ti maysa a mannursuro iti Biblia idiay Missouri, E.U.A.: “Magustuak ti simple a pannakaisuratna. Ita pay laeng a nakakitaak iti kasta kaurnos a panagsasaruno dagiti suheto.” Apaman a nakaalan iti libro nga Isursuro ti Biblia, intedna dayta iti maysa a babai a naupay nga agadal iti Biblia.

Kinuna dayta a mannursuro iti Biblia: “Dina pay nalpas a binasa ti umuna a kapitulo, inawagannakon ket imbagana a magustuanna unay dayta.” Kinuna dayta a babai nga iti panagriknana, dayta a libro ket nairanta agpaay kenkuana isu a kayatna ti agpayadal manen iti Biblia. Kinuna pay ti mannursuro a kalpasan a nairingpasda nga inadal ti umuna a sangapulo a kapitulo, makaparagsak a makita ti napalaus a rag-o dayta a babai gapu kadagiti naadalna.

Nupay awan pay dua a tawen sipud nairuar ti libro nga Isursuro ti Biblia, nasurok a 50 a milion a kopia a nayimprentan iti nasurok a 150 a pagsasao. Mabalinmo ti agkiddaw iti kopiam no suratam ti naipakuyog a kahon ken ibusonmo dayta iti naipaay nga adres wenno iti maitutop nga adres iti panid 5 daytoy a magasin.

□ Kayatko ti maaddaan iti kopia ti libro a naipakita ditoy.

□ Interesadoak iti libre a panagadal iti Biblia.