Kayatmo Kadi ti Agbalin a Gayyem ti Dios?

● Ania ti sungbatmo iti dayta a saludsod? “Panagkunak ket imposible,” kinuna ti maysa a balasitang iti naiputputong a paset ti estado ti Guerrero, Mexico. Madama idi nga ipakpakita kenkuana ti dua a babbai a Saksi ni Jehova ti broshur a Mabalinmo ti Makigayyem iti Dios! iti mismo a lenguahena. Nasdaaw ta magun-odan dayta a broshur iti lenguahena a Tlapalec yantangay dagiti laeng publikasion ti gobierno ti makitkitana a maipabpablaak iti mismo a lenguahena.

Inlawlawag ti dua a Saksi a ti mismo a broshur ket pammaneknek iti panagayat ti Namarsua kenkuana ta mabalin a maam- ammona ti Dios babaen iti dayta. Binasana a dagus ti umuna a leksion a napauluan iti “Aw-awisennaka ti Dios nga Agbalin a Gayyemna.” Kalpasan a nabasana, kinunana: “Kayatko ti agbalin a gayyem ti Dios. Mabalin kadi nga iyalaandak iti Biblia?” Idi nagsubli dagiti Saksi tapno itedda kenkuana ti Biblia, kiniddaw ti nanang ti balasitang nga agtalinaedda pay laeng tapno itultuloyda nga iyadalan ida.

Maysa laeng ti Tlapanec kadagiti 17 a lenguahe dagiti Indian iti Mexico a pakayim-imprentaan ti broshur a Mabalinmo ti Makigayyem iti Dios! Iti intero a lubong, magun-odan dayta iti 278 a lenguahe (a pakairamanan ti Braille). No kayatmo ti maaddaan iti kopia, mabalinmo ti agkiddaw. Suratam laeng ti naipakuyog a kupon ken ipatulodmo dayta iti adres a makita iti baba wenno iti maitutop nga adres a nailista iti panid 5 daytoy a magasin.

□ Kayatko ti maaddaan iti kopia ti broshur a naipakita ditoy.

□ Interesadoak iti libre a panagadal iti Biblia.