Immuna ti Nakaparsuaan

“Imtuodam, pangngaasim, . . . dagiti nagpayak a parsua iti langlangit, ket ibagadanto kenka. . . . Ti met laeng ima ni Jehova inaramidna daytoy.”—Job 12:7-9.

AMIN a banag maipapan kadagiti billit ket agparang a nadisenio para iti panagtayab. Kas pagarigan, dagiti ungkay kadagiti dutdot ti payak ti mangsuporta iti intero a dagsen ti billit bayat ti panagtayabna. Apay a nakapigpigsa dagiti nakalaglag-an a payak? No putdem ti ungkay ti dutdot, maammuam no apay. Umasping dayta iti aw-awagan dagiti inheniero a foam-sandwich beam. Kasla espongha ti unegna ken nakersang ti ruarna. Dagiti inheniero inadalda ti ungkay ti dutdot, isu a maus-usaren dagiti foam-sandwich beam kadagiti eroplano.

Nakaskasdaaw met ti pannakadisenio ti tultulang dagiti billit. Ungaong ti uneg ti kaaduan kadagita, ken napatibker ti dadduma babaen kadagiti makin-uneg a tukal iti porma nga umasping iti aw-awagan dagiti inheniero kas Warren girder. Makapainteres ta kasta met la a disenio ti maus-usar kadagiti payak dagiti lugan a maipatayab iti law-ang.

Dagiti piloto balansienda dagiti kabaruan nga eroplano babaen iti panangyungap wenno panangiserrada iti sumagmamano a pannakaparaypay ti payak ken ipus dagita. Ngem us-usaren ti billit ti agarup 48 a masel iti payak ken abagana tapno mapagukrad ken mapaggarawna dagiti payakna ken ti tunggal dutdotna. Mamin-adu nga aramidenna dayta kada segundo. Di pakasdaawan a ti panagtayab dagiti billit ket ap-apalan dagiti diseniador ti eroplano!

Adu nga enerhia ti kasapulan nangruna bayat ti panagbuelo nga agpangato. Isu a kasapulan dagiti billit ti napigsa a “makina.” Kadawyanna a ti puso ti billit ket dakdakkel, napigpigsa, ken napaspaspas ti panagpitikna ngem iti puso ti mamalia a kadkadakkelna. Naiduma met ti bara ti billit ta nadisenio a maysa la ti direksion ti angin nga angsenna isu a naan-annayas dayta ngem iti bara ti mamalia.

Nadisenio ti adu a billit a makaawit iti umdas a fuel para kadagiti nakaskasdaaw ti kaadayona a panagtayab. Ti maysa a kita ti dumaydayo a tumatayab a kasla billit-tuleng mabalin a maksayan iti kagudua ti dagsenna bayat ti 10 nga oras a panagtayabna. Ngem no ti bar-tailed godwit ket agtayab manipud Alaska agingga iti New Zealand, taba ti nasurok a kagudua ti dagsenna. Dayta ti makagapu a makatayab a di agsarsardeng iti agarup 190 nga oras (8 nga aldaw). Awan ti pangpasahero nga eroplano a makaaramid iti kasta.