Inted ni Jesus ti Biagna Agpaay iti Adu

Imbaga ni Jesus kadagiti pasurotna nga isu ket immay ditoy daga, “saan a tapno pagserbian, no di ket tapno agserbi ken tapno itedna ti kararuana kas subbot a kasukat dagiti adu.” (Mateo 20:28) Sitatallugod nga intedna ti biagna tapno magunggonaan ti sabsabali.

Kasano nga impaay ni Jesus ti subbot babaen iti ipapatayna? Apay a kasapulan dayta? Siasino ti nangipaayan ni Jesus iti biagna? Ken ania ti maaramidan kenka ti ipapatayna?

Naimpusuan nga awisendaka dagiti Saksi ni Jehova a makitaripnong kadakuada a mangusig kadagiti sungbat ti Biblia kadagita a saludsod. Iti daytoy a tawen, ti anibersario ti ipapatay ni Jesus ket maangay inton Martes, Marso 30, kalpasan ti ilelennek ti init. Iti dayta nga okasion, mailawlawagto dagiti sungbat ti Biblia kadagiti saludsod nga adda iti ngato.

Mabalinmo ti tumabuno iti Kingdom Hall a kaasitgan iti pagnanaedam. Damagem kadagiti Saksi ni Jehova iti lugaryo ti eksakto nga oras ken lugar a pakaangayan dayta.