‘Ti Sirib Agpukpukkaw’—Mangmangngegmo Kadi?
“Saan aya a ti sirib agpukpukkaw, ket ti panangilasin iyes-esngawna ti timekna? Iti tapaw dagiti kangatuan, iti igid ti dalan, iti nagsangaan dagiti dana, nagsaad dayta. . . . Iti daramuangan dagiti pagserkan ipukpukkawna a sipipigsa.”—PROVERBIO 8:1-3.
NAKAPATPATEG ti sirib. No awan dayta, masansan nga agkamalitayo. Ngem pakasarakan iti pudno a sirib? Ti di maartapan a sirib ti Namarsua kadatayo ti pampanunoten idi ti nangisurat iti libro a Proverbio. Ti sirib ti Dios ket magun-odan met ti dandani amin a tao babaen ti maysa a naisangsangayan unay a libro, ti Biblia. Usigem dagitoy:
Ti Biblia ti “kasaknapan a naiwaras a libro iti intero a historia,” kuna ti The World Book Encyclopedia. “Naipatarus daytan iti ad-adu a daras, ken iti ad-adu a lengguahe, ngem iti aniaman a libro.” Ti intero a Biblia wenno dadduma a pasetna ket magun-odanen iti dandani 2,600 a lengguahe, isu a mabasa daytan ti nasurok a 90% iti amin a tattao.
“Agpukpukkaw” met ti sirib iti mas literal nga anag. Mabasatayo iti Mateo 24:14: “Daytoy naimbag a damag ti pagarian maikaskasabanto iti intero a mapagnaedan a daga maipaay a pangsaksi kadagiti amin a nasion; ket iti kasta umayton ti panungpalan” daytoy agdama a lubong.
Dayta a “naimbag a damag” ti pudno a sirib. Ngamin, isursurona ti Pagarian—ti nainsiriban a solusion ti Dios kadagiti problema ti sangatauan. Dayta a Pagarian ket maysa a gobierno ti Dios a mangiturayto iti intero a daga—maysa a lubong, maysa a gobierno. (Daniel 2:44; 7:13, 14) Dayta ti gapuna nga inkararag ni Jesus: “Umay koma ti pagariam. Maaramid koma ti pagayatam, kas sadi langit, kasta met iti daga.”—Mateo 6:9, 10.
Ibilang dagiti Saksi ni Jehova a pakaidayawan ti panangipakaammo iti Pagarian ti Dios iti 239 a pagilian! Wen, ti sirib—ti sirib ti Dios—ket talaga nga “agpukpukkaw,” uray “iti daramuangan dagiti pagserkan.” Mangmangngegmo kadi?