Epektibo a Panangusar Kadagiti Makita a Katulongan (Visual Aid)

APAY nga agusarka kadagiti makita a katulongan no mangisuroka? Agsipud ta pagbalinenna a mas epektibo ti panangisurom. Nagusar ni Jehova a Dios ken ni Jesu-Kristo kadagiti makita a katulongan, ket makaadaltayo kadakuada. No mapakuyogan ti berbal a sao kadagiti makita a katulongan, dua a sentido ti pakayallatiwan ti impormasion. Makatulong daytoy a mangtengngel iti atension dagiti agdengdengngeg ken ad-adda a maitukit ti impormasion. Kasano a mausarmo dagiti makita a katulongan iti panangidatagmo iti naimbag a damag? Kasano a masiguradom nga epektibo ti panangusarmo kadagita?

No Kasano nga Inusar Dagiti Katatan-okan a Mannursuro Dagiti Makita a Katulongan. Nagaramat ni Jehova kadagiti nalaka a matandaanan a makita a katulongan iti panangisurona kadagiti napateg a leksion. Iti maysa a rabii, impanna ni Abraham iti ruar ket kinunana: “Tumangadka, pangngaasim, iti langlangit ket bilangem dagiti bituen, no kabaelam a bilangen ida. . . . Kasta ti pagbalinanto ti bin-im.” (Gen. 15:5) Nupay kasla imposible ti naikari kenkuana no iti panangmatmat ti tao, natukay iti kasta unay ti rikna ni Abraham ket insaadna ti pammatina ken Jehova. Naminsan, imbaon ni Jehova ni Jeremias iti balay ti agdamdamili ket pinastrekna iti pagdamdamilian tapno buyaenna ti panangmolde ti agdamdamili iti pila. Pudno a maysa daytoy a narigat a malipatan a leksion maipapan iti kinaturay ti Namarsua kadagiti tattao! (Jer. 18:1-6) Ken kasano a malipatan ni Jonas ti asi nga insuro ni Jehova kenkuana babaen ti mula a tabungaw? (Jon. 4:6-11) Binilin pay ni Jehova dagiti mammadtona nga idramada dagiti naimpadtuan a mensahe babaen ti panangusarda kadagiti maitutop nga alikamen. (1 Ar. 11:29-32; Jer. 27:1-8; Ezeq. 4:1-17) Dagiti mismo a paset ti tabernakulo ken ti templo ket representasion a tumulong kadatayo a mangtarus kadagiti nailangitan a banag. (Heb. 9:9, 23, 24) Nagusar met ti Dios iti adu a sirmata a mangyallatiw kadagiti napateg nga impormasion.​—Ezeq. 1:4-28; 8:2-18; Ara. 10:9-16; 16:9, 10; Apoc. 1:1.

Kasano nga inaramat ni Jesus dagiti makita a katulongan? Idi pinadas dagiti Fariseo ken dagiti pasurot ni Herodes a tiliwen kadagiti saona, nagkiddaw ni Jesus iti denario ket impakitana ti ladawan ni Cesar iti sinsilio. Kalpasanna, inlawlawagna a rumbeng nga itedda ken Cesar ti kukua ni Cesar ngem itedda iti Dios ti kukua ti Dios. (Mat. 22:19-21) Tapno maisurona ti leksion maipapan iti panangpadayaw iti Dios babaen ti amin nga ik-ikutantayo, idi adda iti templo intudo ni Jesus ti maysa a napanglaw a balo a ti kontribusionna​—dua a babassit a sinsilio​—ket isu laeng ti adda a pagbiagna. (Luc. 21:1-4) Iti sabali a gundaway, inusarna ti maysa nga ubing a kas ulidan ti kinapakumbaba, nga awanan iti tarigagay a maitan-ok. (Mat. 18:2-6) Personal met nga indemostrana ti kaipapanan ti kinapakumbaba babaen ti panangbuggona iti saksaka dagiti adalanna.​—Juan 13:14.

No Kasano nga Usaren Dagiti Makita a Katulongan. Saan a kas ken Jehova, ditay kabaelan ti makisarita babaen dagiti sirmata. Nupay kasta, adu dagiti mamagpanunot a ladawan nga agparang kadagiti publikasion dagiti Saksi ni Jehova. Usarem dagita a tumulong kadagiti interesado a tattao a mangsirmata iti Paraiso a daga, a naikari iti Sao ti Dios. No mangyadalka iti Biblia iti pagtaengan, mabalinmo nga iturong iti atension ti iyad-adalam ti ladawan a nainaig iti ad-adalenyo ket kiddawem nga ibagana kenka no ania ti makitana. Makapainteres ta idi dimteng dagiti sirmata ken ni propeta Amos, insaludsod ni Jehova: “Ania ti makitam, Amos?” (Amos 7:7, 8; 8:1, 2) Mabalinmo nga usaren dagiti kasta met laeng a saludsod tapno maiturong ti atension dagiti tattao kadagiti ladawan a nairanta a makita a katulongan iti panangisuro.

No isuratmo dagiti kalkulasion ti matematika wenno usarem ti tsart ti kronolohia a mangipakita iti panagsasagadsad dagiti napateg a pasamak, nalaklaka a matarusan dagiti tattao dagiti padto a kas iti “pito a panawen” iti Daniel 4:16 ken ti “pitopulo a lawas” iti Daniel 9:24. Agparang dagiti kasta a makita a katulongan iti dadduma kadagiti publikasion nga ad-adalentayo.

Iti sangapamiliaan a panagadalyo iti Biblia, nalaklaka a maawatan ti pannakailawlawag dagiti banag a kas iti tabernakulo, ti templo sadi Jerusalem, ken ti templo a nasirmata ni Ezequiel no agusarkayo iti ladawan wenno diagrama. Masarakan dagitoy iti Insight on the Scriptures, apendise ti New World Translation of the Holy Scriptures​—With References, ken iti nadumaduma a ruar Ti Pagwanawanan.

Iti sangapamiliaan a panagbasayo iti Biblia, usarenyo a naimbag dagiti mapa. Surotenyo ti dinaliasat ni Abraham manipud Ur agingga idiay Haran nga agturong idiay Bethel. Usigenyo ti ruta a sinurot dagiti Israelita idi pinanawanda ti Egipto ken nagturongda iti Naikari a Daga. Birokenyo ti lugar a naited iti tunggal tribu ti Israel kas tawid. Kitaenyo ti masakupan ti pagarian ni Solomon. Surotenyo ti ruta ni Elias idi nagtalaw manipud Jezrael agingga a dimmanon iti let-ang iti labes ti Beer-seba kalpasan a pinangtaan ni Jezebel. (1 Ar. 18:46–19:4) Birokenyo dagiti siudad ken ili a nangaskasabaan ni Jesus. Surotenyo dagiti lugar a dinaliasat ni Pablo a nadeskribir iti libro dagiti Aramid.

Epektibo dagiti makita a katulongan no ilawlawagmo kadagiti iyad-adalam iti Biblia ti panagandar ti kongregasion. Mabalinmo nga ipakita iti iyad-adalam ti nayimprenta a programa ket ilawlawagmo no ania dagiti impormasion a maidatag kadagiti asamblea ken kombension. Adu dagiti nagsiddaaw iti personal a panagpasiarda iti Kingdom Hall wenno iti maysa kadagiti sanga nga opisina dagiti Saksi ni Jehova. Epektibo daytoy a pamay-an a mangiwaksi kadagiti di umiso a kapanunotan maipapan iti trabahotayo ken ti panggep daytoy. No ipasiarmo ida iti Kingdom Hall, ibagam ti nakaidumaanna kadagiti dadduma a lugar a pagdayawan. Itampokmo ti kinasimple dayta a lugar a pagadalan. Itudom dagiti benneg a nangnangruna a nadisenio para iti ministeriotayo iti publiko​—ti pagalaan iti literatura, mapa ti teritoria, ken kahon a pagitinnagan iti kontribusion (imbes a pinggan a pagur-or).

No addaanka kadagiti video a naisagana iti panangiturong ti Bagi a Manarawidwid, usarem dagitoy a mangpabileg iti panagtalek iti Biblia, mangisuro kadagiti iyad-adalam maipapan iti trabaho dagiti Saksi ni Jehova, ken mangparegta kadagiti agbuya nga agbiag a maitunos kadagiti prinsipio ti Biblia.

Panangusar Kadagiti Makita a Katulongan Para Kadagiti Dadakkel a Grupo. No nasayaat ti pannakaisaganana ken umiso ti pannakausarna, dagiti makita a katulongan ket epektibo iti panangisuro kadagiti dadakkel a grupo. Ipapaay ti klase matalek ken masirib nga adipen ti kakasta a nadumaduma a porma ti makita a katulongan.

Dagiti maadal nga artikulo iti Ti Pagwanawanan ket masansan a napakuyogan kadagiti ladawan nga usaren ti konduktor a mangipaganetget kadagiti napateg a punto. Pudno met dayta kadagiti publikasion a mausar iti Panagadal iti Libro ti Kongregasion.

Adda dagiti balabala para iti palawag publiko a mabalin ti agusar kadagiti makita a katulongan a mangyilustrar kadagiti punto. Nupay kasta, masansan a dakdakkel ti magunggona no maipamaysa ti atension iti ibagbaga ti Biblia, nga ig-iggaman ti kaaduan kadagiti agdengdengngeg. No kas pagarigan ta masapul nga agusarka iti ladawan wenno ababa a balabala dagiti kangrunaan a punto tapno maipaawat ti maysa wenno sumagmamano a kangrunaan a punto ti palawag, siguraduem a nasaksakbay a ti makita a katulongan nga usarem ket nalawag a makita (wenno mabasa) dagidiay nakatugaw iti likudan. Sagpaminsan la koma a mausar ti kakasta a banag.

Saan a manglinglingay ti panggeptayo a mangusar kadagiti makita a katulongan no agpalawag ken mangisurotayo. No mausar ti nadayaw a makita a katulongan, maipaganetgetna koma dagiti ideya a rumbeng a maitampok a naimbag. Nasayaat ti maaramidan dagiti kasta a katulongan no tumulongda a mangilawlawag iti berbal a sao, a pagbalinenda a nalaklaka a maawatan, wenno pasingkedanda ti kinaumiso daydiay naisao. No umiso ti pannakausarna, mabalin a nagsayaat ti epekto ti maikanatad a makita a katulongan ket dagiti sabsabali malaglagipdanto dayta ken ti punto a nasursuroda uray kalpasan ti adu a tawen.

Ti panagdengngeg ken panagkita ket agpada nga addaan iti napateg a paset iti panagsursuro. Laglagipem no kasano nga inusar dagiti katatan-okan a Mannursuro dagitoy a sentido, ket ikagumaam a tuladen ida iti panagreggetmo a mangdanon iti puso dagiti sabsabali.