Siasino a Talaga ti Mangkonkontrol iti Lubong?

TI KUNA TI BIBLIA

“Daydiay Managdakdakes konkontrolenna ti intero a lubong.”​—1 Juan 5:19.

“Immay ti Anak ti Dios . . . tapno dadaelenna ti aramid ti diablo.”​—1 Juan 3:8, New Century Version.

TI MAIPAAYNA KENKA NO PATIEM DAYTA

Maawatam ti makagapu kadagiti problema iti lubong.​—Apocalipsis 12:12.

Makapagtalekka a sumayaatto ti lubongtayo.​—1 Juan 2:17.

MAPAGTALKANTAYO KADI TI KUNA TI BIBLIA?

Wen, gapu iti tallo a rason:

• Asidegen nga agpatingga ti panangituray ni Satanas. Determinado ni Jehova a mamagpatingga iti panangkontrol ni Satanas iti sangatauan. Inkarina a “pukawenna ti Diablo” ken ikkatenna ti amin nga epekto ti inaramid ni Satanas.​—Hebreo 2:14, Baro a Lubong a Patarus.

• Ni Jesu-Kristo ti pinili ti Dios a mangituray iti lubong. Naan-anay a naiduma ni Jesus no idilig iti agdama a naulpit ken managimbubukodan nga agturay iti daytoy a lubong. Inkari ti Dios maipapan iti panagari ni Jesus: “Maasianto kadagiti marigrigat ken napanglaw . . . Isalakannanto ida iti pannakairurumen ken iti kinaranggas.”​—Salmo 72:13, 14.

• Saan nga agulbod ti Dios. Nalawag a kuna ti Biblia: “Imposible nga agulbod ti Dios.” (Hebreo 6:18) No adda ikari ni Jehova nga aramiden, sigurado a tungpalenna! (Isaias 55:10, 11) “Mapapanawto ti agturay iti daytoy a lubong.”​—Juan 12:31.