Agturay a Makabael a Mangkontrol iti Nakaparsuaan

Dakkel ti epektona kadagiti tattao ti panangpakan ni Jesus iti rinibu babaen iti milagro. Imbagada a “daytoy ti Propeta a naipadto nga umay ditoy lubong,” ti Mesias, ken sigurado nga agbalin a nasayaat nga agturay. (Juan 6:14; Deuteronomio 18:18) Gapuna, implano dagiti tattao a tiliwen ni Jesus ket pagbalinenda nga ari.

Ngem ammo ni Jesus ti plano dagiti tattao. Pinapanawna ida ket binilinna dagiti adalanna nga agsublida iti bangkada. Sadino ti papananda? Idiay Betsaida ken kalpasanna, idiay Capernaum. Ngem agmaymaysa ni Jesus a napan iti bantay tapno agkararag iti dayta a rabii.

Gapu ta naslag ti bulan iti dayta a parbangon, makitkita ni Jesus ti ayan ti bangka uray adayo. Dadakkel ti dalluyon ti baybay gapu iti napigsa nga angin, isu a dagiti apostol ‘marigrigatanda nga aggaud ta sumuba kadakuada ti angin.’ (Marcos 6:48) Simmalog ni Jesus iti bantay ket nagna iti rabaw dagiti dalluyon a nagturong kadakuada. ‘Nakaadayoda idin iti agarup lima wenno innem a kilometro.’ (Juan 6:19) Nakita dagiti adalan a kasla limmabas kadakuada ni Jesus, isu a gapu iti butengda, impukkawda: “Ania dayta umas-asideg?”​—Marcos 6:49.

Tapno saanda a mabuteng, kinuna ni Jesus: “Dikay agbuteng! Siak daytoy.” Ngem kinuna ni Pedro: “Apo, no sika dayta, papagnaennak iti rabaw ti danum nga umay dita ayanmo.” Insungbat ni Jesus: “Umayka!” Gapuna, dimsaag ni Pedro iti bangka ket nagna iti rabaw ti danum a nagturong ken Jesus. Ngem idi nakita ni Pedro ti napigsa nga angin, nagbuteng ket nangrugi a lumned. Impukkawna: “Arayatennak, Apo!” Dagus nga inyawat ni Jesus ti imana ket iniggamanna ni Pedro sa kinunana: “Bassit ti pammatim, apay a nagduaduaka?”​—Mateo 14:​27-31.

Nagluganen da Pedro ken Jesus iti bangka, ken nagtalnan ti angin. Nasdaaw dagiti adalan, ngem rumbeng kadi a masdaawda? No naawatanda ti “kaipapanan dagiti tinapay,” ti milagro nga inaramid ni Jesus a nangpakan iti rinibu sumagmamano laeng nga oras ti napalabas, saanda koma a nasdaaw a kabaelan ni Jesus ti magna iti rabaw ti danum ken pagtalnaen ti angin. Gapuna, nagruknoyda ken Jesus ket kinunada: “Pudno a sika ti Anak ti Dios.”​—Marcos 6:52; Mateo 14:33.

Di nagbayag, nakadanondan iti napintas ken nabunga a kapatagan ti Genesaret iti abagatan ti Capernaum. Inyangklada ti bangka sa dimsaagda. Nailasin dagiti tattao ni Jesus. Gapuna, dagiti umili ken dagiti tattao a naggapu iti sabali a lugar impanda kenkuana dagiti masakit. Uray sagidenda laeng ti gayadan ti makinruar a bado ni Jesus, naan-anay nga umimbagda.

Kabayatanna, dagiti tattao a nakakita iti pannakapakan ti rinibu babaen ti milagro naammuanda a pimmanawen ni Jesus. Gapuna, idi simmangpet dagiti babassit a bangka manipud Tiberias, nagluganda ket napanda idiay Capernaum tapno birokenda ni Jesus. Idi nasarakanda, dinamagda: “Rabbi, kaano a nakadanonka ditoy?” (Juan 6:25) Tubngaren ida ni Jesus, ngem adda nasayaat a makagapu, kas makitatayto.