Apendise

Mensahe Kadagiti Kristiano a Nagannak:

Kas nagannak, kayatyo a tulongan dagiti ipatpategyo nga annak tapno ayatenda ni Jehova ken agdedikarda kenkuana. Kasanoyo a maisagana ida para iti panagpabautisarda? Kasanoyo a maammuan no nakasaganadan nga agpabautisar?

Imbilin ni Jesus kadagiti pasurotna: “Inkayo . . . kadagiti tattao iti amin a nasion ket pagbalinenyo ida nga adalak, ken bautisaranyo ida.” (Mat. 28:19) Sigun iti daytoy a teksto, sakbay nga agpabautisar ti maysa, masapul pay nga agbalin nga adalan. Saan la a basta maawatan ken patien ti maysa nga adalan dagiti pannursuro ni Kristo no di ket tungpalenna met dagita. Kabaelan nga aramiden daytoy uray dagiti agtutubo.

Agbalinkayo a nasayaat nga ulidan kadagiti annakyo, ken isuroyo kadakuada dagiti pannursuro ni Jehova. (Deut. 6:6-9) Usarenyo ti impormasion iti libro nga Agbiagka a Naragsak iti Agnanayon! a mangisuro kadakuada kadagiti kangrunaan a sursuro ti Biblia ken mangisagana kadakuada a mangilawlawag kadagiti prinsipio ti Biblia ken mangyaplikar kadagita. Tulonganyo dagiti annakyo a mangilawlawag kadagiti patpatienda. (1 Ped. 3:15) Ti pannakaammo ken pammaregtayo kadakuada, ti personal a panagadalda, panagdaydayaw ti pamilia, pannakigimong, ken ti impluensia dagiti nasayaat a gagayyemda ket makatulong kadakuada tapno mabautisaranda ken agtultuloyda a rumang-ay. Paregtaenyo ida a rumagpat kadagiti naespirituan a kalat.

Kuna ti Proverbio 20:11: “Maam-ammo ti ubing babaen ti ar-aramidna, no nadalus ken umiso ti kababalinna.” Ania dagiti ar-aramid a mangipakita no ti ubing, lalaki man wenno babai, ket maysan nga adalan ni Jesu-Kristo ken nakasaganan nga agpabautisar?

Ti ubing a nakasaganan nga agpabautisar ket masapul nga agtulnog iti nagannakna. (Ara. 5:29; Col. 3:20) Idi agtawen ni Jesus iti 12, kuna ti Biblia: “Intultuloyna ti nagpasakup [kadagiti nagannakna].” (Luc. 2:51) Siempre, diyo namnamaen a saan nga agkamali dagiti annakyo. Ngem no ti maysa ket kayatnan ti agpabautisar, ikagumaanna a suroten ti ulidan ni Jesus ken agpasakup kadagiti nagannakna.

Ipakpakitana met ti interesna nga agadal kadagiti kinapudno iti Biblia. (Luc. 2:46) Kayat kadi ti anakyo ti tumabuno ken makipartisipar kadagiti gimong? (Sal. 122:1) Regular kadi nga agbasbasa iti Biblia ken adda personal a panagadalna?​—Mat. 4:4.

Ti ubing a nakasaganan nga agpabautisar iyun-unana ti interes ti Pagarian. (Mat. 6:33) Bigbigenna a responsabilidadna nga iranud dagiti patpatienna. Makiramraman iti nadumaduma a pamay-an ti panangasaba ken saan a mabain a mangibaga kadagiti mannursurona ken kaeskuelaanna nga isu ket maysa a Saksi ni Jehova. Isaganana a naimbag dagiti pasetna iti Gimong a Panagbiag ken Ministerio.

Ikagumaanna met a liklikan dagiti dakes a kakadua tapno agtalinaed a nadalus iti moral. (Prov. 13:20; 1 Cor. 15:33) Makita daytoy kadagiti kaykayatna a musika, pelikula, programa iti telebision, video game, ken ti panagusarna iti Internet.

Adu a nagannak ti nangikagumaan a nangisuro kadagiti annakda tapno maipapusoda ti kinapudno ken makualipikarda nga agpabautisar bayat ti kinaagtutuboda. Bendisionannakayo koma ni Jehova bayat a tultulonganyo dagiti annakyo a mangaramid iti daytoy nagpateg nga addang iti pannakigayyemda ken Jehova.

Mensahe Kadagiti Di Bautisado nga Agibumbunannag:

Nagsayaat a pribilehio ti agserbi a kadua ti kongregasion kas di bautisado nga agibumbunannag. Makomendaran ti panagrang-aymo iti naespirituan. Naam-ammom ti Dios gapu iti napasnek a panangadalmo iti Saona ken ipakpakitam ti pammatim kadagiti karina.​—Juan 17:3; Heb. 11:6.

Sakbay a nakipagadalka kadagiti Saksi ni Jehova, mabalin a miembroka iti sabali a relihion wenno awan ti relihionmo. Mabalin a makiramramanka idi iti dadduma nga aramid a maikontra kadagiti prinsipio ti Biblia. Ngem ita, ipakpakitamon ti pammatim babaen ti naimpusuan a panagbabawim kadagiti dakes a naaramidam ken babaen ti pannakakombertem, kayatna a sawen a tinallikudamon ti dakes nga aramidmo iti napalabas ken determinadokan a mangaramid iti umiso iti imatang ti Dios.​—Ara. 3:19.

Iti sabali a bangir, nalabit naammuam ti nasantuan a sursurat “manipud idi maladagaka” ket nailiklikka iti dakes a kababalin ken nadagsen a basol. (2 Tim. 3:15) Nasursurom a labanan ti impluensia dagiti kakaduam ken ti dadduma pay a pakasulisogan a mangaramid iti dakes iti imatang ni Jehova. Impakitam ti pammatim babaen ti panagtalinaedmo iti pudno a panagdayaw ken panangibagam iti patpatiem iti dadduma. Nasanayka iti Nakristianuan a ministerio. Ita, inkeddengmon ti agserbi ken Jehova kas di bautisado nga agibumbunannag.

Naisuro man kenka dagiti dalan ni Jehova manipud iti kinamaladagam wenno ita laeng a naam-ammom ni Jehova, mabalin a pampanunotemon nga aramiden ti dua pay nga addang iti panagrang-aymo iti naespirituan​—ti dedikasion ken bautismo. Agdedikarka ken Jehova babaen ti panagkararagmo ket ibagam ti desisionmo nga agnanayon nga ipaaymo kenkuana ti naipamaysa a debosion. (Mat. 16:24) Kas simbolo dayta a dedikasion, mabautisaranka iti danum. (Mat. 28:19, 20) Babaen ti dedikasion ken bautismo, agbalinka nga ordinado a ministro ni Jehova a Dios. Nagsayaat ketdin a pribilehio dayta!

Kas naammuam iti panagadalmo iti Biblia, mabalin a maipasangokanto iti nadumaduma a pakasuotan. Laglagipem a kalpasan la unay ti bautismona, “ti nasantuan nga espiritu inturongna ni Jesus idiay let-ang. Sadiay a sinulisog ti Diablo.” (Mat. 4:1) Kalpasan ti panagpabautisarmo kas adalan ni Kristo, ekspektarem nga adda dagiti dumteng a pannubok. (Juan 15:20) Nadumaduma dagitoy. Mabalin a busorennaka ti pamiliam. (Mat. 10:36) Mabalin nga uyawendaka dagiti kaeskuelaam, katrabahuam wenno dagiti dati a kakaduam. Kanayon koma a laglagipem ti sasao ni Jesus iti Marcos 10:29, 30: “Pudno kunak kadakayo, asinoman a nangpanaw iti balay wenno kakabsat a lallaki wenno kakabsat a babbai wenno ina wenno ama wenno annak wenno taltalon maigapu kaniak ken iti naimbag a damag, ket mamin-100 iti daytoy a tiempo ti awatenna a balay, kakabsat a lallaki, kakabsat a babbai, inna, annak, ken taltalon, agraman pannakaidadanes, ken iti masanguanan a sistema ti bambanag, biag nga agnanayon.” Itultuloymo ngarud nga ikagumaan ti agtalinaed a nasinged ken Jehova ken agbiag a maitunos kadagiti nalinteg a pagalagadanna.

No kayatmon ti agpabautisar, ibagam dayta iti koordineytor ti bagi dagiti panglakayen. Dagiti saludsod kalpasan daytoy a mensahe ti usaren dagiti panglakayen a makisarita kenka tapno maammuanda no kualipikadokan nga agpabautisar. Mabalinmo a repasuen dagitoy a saludsod bayat ti regular a personal a panagadalmo.

Kas panagsagana, iwayaam a basaen ken mennamennaen dagiti nakotar a teksto ti Biblia. Mabalinmo nga isurat dagiti komentom iti daytoy a libro wenno iti sabali pay a paginotaran. Mabalinmo nga usaren dagita nga insuratmo ken pagtalinaeden a nakalukat daytoy a libro bayat a makisarsarita kenka dagiti panglakayen. No adda saanmo a maawatan a saludsod, agpatulongka iti mangyad-adal kenka iti Biblia wenno kadagiti panglakayen.

Iti pannakisarita kenka dagiti panglakayen, dimo panunoten a masapul a nakaad-adu ti sungbatmo kadagiti saludsod. Nasaysayaat no simple ken direkta ti sungbatmo iti bukodmo a sasao. Kadagiti adu a saludsod, nasayaat no mangibagaka iti maysa wenno dua a teksto iti Biblia a mangipakita iti Nainkasuratan a pakaibatayan ti sungbatmo.

No kurang pay ti pannakaammom kadagiti kangrunaan a sursuro iti Biblia, mangyurnos dagiti panglakayen iti tumulong kenka tapno mayebkasmo iti bukodmo a sasao ti umiso a pannakaawat iti Kasuratan agingga a kualipikadokan nga agpabautisar.

[Palagip kadagiti panglakayen iti kongregasion: Dagiti instruksion no kasano nga aramiden dagitoy a pannakisarita kadagiti kandidato iti bautismo ket adda iti panid 208-212.]