Ni David ken ni Goliat

Imbaga ni Jehova ken Samuel: ‘Mapanka iti balay ni Jesse. Maysa kadagiti annakna a lallaki ti sumaruno nga agbalin nga ari ti Israel.’ Isu a napan ni Samuel iti balay ni Jesse. Idi nakitana ti inauna, pinanunotna: ‘Sigurado nga isu daytoy ti napili.’ Ngem imbaga ni Jehova ken Samuel a saan nga isu ti pinilina. Imbaga ni Jehova: ‘Kitkitaek ti puso ti maysa a tao, saan laeng a ti itsurana.’

Impakita pay ni Jesse ti innem nga annakna a lallaki. Ngem imbaga ni Samuel: ‘Awan kadakuada ti pinili ni Jehova. Adda pay kadi sabali nga annakmo?’ Imbaga ni Jesse: ‘Adda pay, ti inaudi, ni David. Awan ditoy ta agipaspastor kadagiti karnerok.’ Idi nakasangpeten ni David, imbaga ni Jehova ken Samuel: ‘Isu ti pinilik!’ Binukbokan ni Samuel ti ulo ni David iti lana, ket dinutokanna nga agbalinto nga ari ti Israel.

Idi agangay, naglaban dagiti Israelita ken dagiti Filisteo. Adda higante a soldado dagiti Filisteo nga agnagan Goliat a makilablaban para kadakuada. Inaldaw nga uy-uyawen ni Goliat dagiti Israelita. Impukkawna: ‘Mangibaonkayo iti lumaban kaniak. No abakennak, agbalinkaminto nga adipenyo. Ngem no abakek, agbalinkayto nga adipenmi.’

Napan ni David iti kampo dagiti soldado nga Israelita tapno mangted iti makan kadagiti soldado a manongna. Nangngegna ti ibagbaga ni Goliat ket kinunana: ‘Labanak!’ Imbaga ni Ari Saul: ‘Ngem maysaka laeng nga ubing.’ Simmungbat ni David: ‘Tulongannak ni Jehova.’

Insuot ni Saul ken David ti badona a pakigubat, ngem imbaga ni David: ‘Diak kaya ti makilaban no usarek daytoy.’ Innala ni David ti pallatibongna ket napan iti waig. Nangpili iti lima a nalinis a bato sa inkabilna iti pagikkanna. Kalpasanna, timmaray a napan ken Goliat. Impukkaw ti higante: ‘Umayka ditoy, sika nga ubing. Ipakanka kadagiti billit ken kadagiti atap nga animal.’ Saan a nagbuteng ni David. Impukkawna met: ‘Labanannak babaen ti espada ken pika, ngem labananka iti nagan ni Jehova. Saan a dakami ti lablabanam. Ti Dios ti lablabanam. Makitanto ti amin nga adda ditoy a napigpigsa ni Jehova ngem iti espada wenno pika. Tulongannakaminto ket abakendakayo.’

Nangikabil ni David iti bato iti pallatibongna sa impigsana nga inwasawas. Iti tulong ni Jehova, timmama ti bato iti muging ni Goliat ket limmumlom. Natumba ti higante ket natay. Nagtataray dagiti Filisteo. Agtaltalekka kadi met ken Jehova a kas ken David?