ADALEN 12

Naimpusuan ken Addaan Empatia

1 Tesalonica 2:7, 8

SUMARIO: Agsaoka a naimpusuan, ken ipariknam kadagiti agdengdengngeg nga interesadoka kadakuada.

Panunotem dagiti agdengdengngeg. Isaganam ti pusom ken ikabilangam dagiti problemada. Panunotem no ania ti riknada.
Piliem a naimbag ti usarem a sasao. Ikagumaam a bang-aran, liwliwaen, ken paregtaen dagiti agdengdengngeg. Dika agusar iti sasao a mabalin a makapasakit kadakuada, ken dika agsao iti negatibo maipapan kadagiti di manamati wenno iti patpatienda.
Ipakitam nga interesadoka. Ipakitam kadagiti agdengdengngeg a talaga nga interesadoka babaen ti nasingpet a tono ti boses ken maitutop a panagkompas. Sipapanunotka koma iti ekspresion ti rupam; kanayonka nga umisem.

Saan koma a mapilpilit wenno sobra ti ipakitam nga emosion. Bayat ti panagbasam, iyebkasmo ti rikrikna nga ipakita ti teksto, ngem saanmo nga iturong ti atension iti bagim. Ikagumaam ti agsao iti nasingpet ken naayat a pamay-an.