TI LINAON DAYTOY A PUBLIKASION
Ti panggep daytoy a publikasion ket tapno tulongannaka a maaddaan iti nauneg a pannakatarus iti Kasuratan. Kasano? Babaen ti panangummongna kadagiti detalye manipud amin a paset ti Biblia a nainaig kadagiti suheto a maus-usig. Babaen ti panangiturongna iti atension kadagiti sasao iti orihinal a lenguahe ken no ania ti literal a kaipapananda. Babaen ti panangusigna iti nainaig nga impormasion manipud sekular a pakasaritaan, panagsirarak dagiti arkeologo, ken dadduma pay a tay-ak ti siensia, ken babaen ti panangtingitingna iti daytoy sigun iti panangmatmat ti Biblia. Babaen ti panangipaayna iti nadumaduma a visual aid. Ken babaen ti panangtulongna kenka a mangbigbig iti kinapateg ti panagtignay maitunos iti ibagbaga ti Biblia.
Ti Biblia isalaysayna dagiti pannakilangen ni Jehova a Dios iti sangatauan, ket iparangna dayta iti pamay-an a makakombinsir a pudpudno a napasamak dagita. Dakamatenna ti nagan ti tattao ken luglugar, dagiti agkakapanawenan a nasion ken agtuturay, ken dagiti espesipiko a kita ti mulmula ken an-animal. Dagiti detalye maipapan iti kasasaad ti tattao ken bambanag ket makatulong kenka nga ad-adda pay a magunggonaan iti pannakatukoy dagita iti Biblia. Tapno matulongannaka ti Pannakatarus iti Kasuratan, naglaon daytoy kadagiti detalyado nga artikulo maipapan iti nasurok a 3,000 a tattao a nainaganan iti Kasuratan kasta met kadagiti detalye maipapan iti 97 a nasion, tribu, ken il-ili. Adda nasurok a 1,000 nga artikulo a mangilawlawag iti espesipiko a luglugar, ken nasurok a 90 nga artikulo ti maipapan iti nadumaduma a mula, ken nasurok a 100 nga artikulo ti maipapan kadagiti tumatayab ken an-animal. Malaksid kadagitoy, adda pay dagiti artikulo a mainaig iti adu a sabali pay a napapateg a suheto iti Kasuratan.
Tunggal libro ti Biblia ket naisangsangayan ti pannakausigna iti daytoy a publikasion. Naidatag ti balabala ti tunggal libro tapno maiturong ti atension kadagiti kangrunaan a kapanunotan nga inlanad ti mannurat, ket iparangna dagita iti pamay-an a nalaka a basaen ken lagipen. Malaksid no adda sabali a patarus a natukoy, ti Baro a Lubong a Patarus ti Nasantuan a Kasuratan, 2000 nga Edision, ti naadaw iti daytoy a reperensia, nupay naisitar ken naadaw met ti nasurok nga 40 a sabsabali pay a patarus.
Dagiti naaramat a visual aid ramanenda ti nakaad-adu a mapa, nga adu kadagita ti mangipakita kadagiti kangrunaan a lugar sigun iti matuktukoy a periodo ti panawen iti pakasaritaan. Adu met dagiti ladawan a tumulong a mangiladawan iti panunotmo kadagiti daga iti Biblia ken iti paspasamak a naaramid sadiay. Ti sumagmamano kadagita ket inaramid dagiti pumipinta kas panangiladawanda kadagiti napateg a pasamak iti pakasaritaan. Adu pay dagiti retrato ti espesipiko a luglugar ken dagiti displey kadagiti museo a nainaig iti rekord ti Biblia. Naipakita iti Tomo 2, iti panid 1468, dagiti panagyaman maipaay iti ladladawan a naala kadagiti displey dagiti museo ken iti dadduma pay a ladawan.
Dagiti nauneg ti pannakausigna nga artikulo ibinsabinsada ti Hebreo, Griego, ken Aramaiko—dagiti pagsasao nga orihinal a naaramat iti pannakaisurat ti Biblia. Ilawlawag dagitoy nga artikulo ti kaipapanan ti napapateg a sasao kadagiti orihinal a lenguahe, saan a sigun laeng iti pannakatarus kadagitoy a termino iti dadduma a pagsasao a silalatak a maar-aramat ita. Dagiti kaipapanan ti nagnagan iti Biblia iti daytoy a publikasion ket naibatay iti pannakaaramat dagiti paset dagitoy a nagan iti orihinal a pagsasao kas makita iti dadduma pay a bersikulo ti Biblia.
Kasano a masarakam dagiti sungbat ti salsaludsodmo a mainaig iti Biblia? (1) Kayatmo kadi a maammuan ti kaipapanan ti partikular a sasao iti Biblia? Ti kadi saludsodmo ket maipapan iti maysa a tao, lugar, wenno nalabit kualidad? Laglagipem nga alpabetiko ti pannakaurnos dagiti amin nga artikulo, ken ti nagnagan ken sasao iti Biblia ket maitunos iti Baro a Lubong a Patarus. Sapulem ti nagan wenno tema a pampanunotem iti artikulo a kasta ti paulona. No saanmo a dagus masarakan ti sapsapulem, kitaem ti Indese Dagiti Tema nga adda iti maudi a benneg ti Tomo 2; ipatuldona ti napateg nga impormasion a mabalin nga adda iti paset a dimo inanamaen. (2) No kasapulam ti pannakailawlawag ti maysa nga espesipiko a kasuratan, direkta a mapanka iti Indese ti Kasuratan iti Tomo 2.
Sapay koma ta parayrayen daytoy a publikasion ti panangipategmo iti Autor ti Biblia, ni Jehova a Dios, ken ipaayannaka daytoy iti naun-uneg a pannakatarus iti kaipapanan ti Saona, ket matignayka nga ad-adda pay a mangyaplikar kadagiti linaonna iti mismo a biagmo ken mangiranud iti sabsabali kadagiti napateg a kinapudno manipud iti dayta.