ABNER
[Ni Ama ket Pagsilawan].
Anak ni Ner, iti tribu ni Benjamin. Ti 1 Samuel 14:50, 51 nalawag a tukoyenna ni Abner kas “ti uliteg ni Saul,” nupay daytoy a sasao iti Hebreo ket mabalin nga iyaplikar ken ni Abner wenno ni Ner nga amana. Kunaen ni Josephus a ni Abner ket kasinsin ni Saul, ket kunaenna nga agkabsat ti ammada a da Ner ken Kis. (Jewish Antiquities, VI, 129, 130 [vi, 6]) Nupay kasta, kasla ad-adda nga umayon ti naipaltiing a pakasaritaan iti 1 Cronicas 8:33 ken 9:39 a ni Kis isu ti anak ni Ner ket, ngarud, kabsat ni Abner. Gapu itoy ni Abner ket uliteg ni Saul.—Kitaenyo met ti tsart iti sidong ti ABIEL Num. 1.
Nagserbi ni Abner kas panguluen ti buyot maipaay ken Saul ket no dadduma ti pakirupak a puersana isu ti kadakkelan iti bilang a nasurok a 200,000 a lallaki. (1Sm 15:4) Kadagiti naisangsangayan nga okasion, kaabayna ti ari iti lamisaan ti bangkete. (1Sm 20:25) Nupay awan duadua a nabileg ken maingel a lalaki ni Abner, idi pugante pay laeng ni David idiay Let-ang ti Zif tinubngarna ni Abner gapu ta saanna a binantayan a naimbag ti mismo nga apona ken “ti pinulotan ni Jehova,” a ni Saul.—1Sm 26:14-16.
Kalpasan ti ipapatay ni Saul gapu iti nakaro a pannakaabakda kadagiti Filisteo, nagsanud ni Abner a bimmallasiw iti Jordan nga agturong iti Mahanaim iti Galaad, nga intugotna ti anak ni Saul a ni Is-boset. Nupay ti tribu ni Juda improklamanan ni David kas ari idiay Hebron, ni Abner insaadna ni Is-boset kas kasalisal nga ari idiay Mahanaim. Nalawag a ni Abner ti pannakabalin nga adda iti likudan ti trono ket idi agangay nagun-odna ti suporta dagiti amin a tribu malaksid iti Juda maigapu ken Is-boset.—2Sm 2:8-10.
Idi agangay, nagsinnarak dagiti buyot ti dua nga agbimbinnusor nga ari tapno agsinnubokda iti bileg idiay Ban-aw ti Gabaon iti teritoria ti Benjamin, adda iti agarup kakatlo ti distansia manipud Hebreo nga agpa-Mahanaim. Kalpasan a natingitingen ti dua a buyot ti kasasaadda, nangisingasing ni Abner iti dangadang iti nagbaetan ti sagsasangapulo ket dua nga agtutubo a mannakigubat iti kada dasig. Agpada ti bileg dagitoy dua a dasig iti kasta nagpipinnatayda, a nakaigapuan ti panagraranget ti amin a kameng ti dua a buyot. Ti buyot ni Abner ket napukawan iti 18 a soldado iti kada maysa a napukaw a soldado ni Joab ket nagtalawda nga agturong iti let-ang.—2Sm 2:12-17, 30, 31.
Idi a ni Abner ket kinamat ti nakaranting a kabsat ni Joab a ni Asael, maulit-ulit nga indagadag kenkuana ni Abner nga agturong laengen iti sabali tapno saanda nga agranget nga agbanag iti ipapatay ni Asael. Idi kimmamat latta ni Asael, sipipigsa nga induyok ni Abner a patallikud ti murdong ti pikana a simmarut dayta iti buksit ni Asael iti kasta napapatayna. (2Sm 2:18-23) Kamaudiananna pinaisardeng ni Joab ti panangkamatda idi lumneken ti init gapu iti kiddaw ni Abner, ket ti dua a buyot nangrugi a nagmartsa a nagsubli kadagiti bukodda a kabesera. Ti kinaandurda ket makita iti 80 km (50 mi) wenno nasursurok pay a minartsa dagiti puersa ni Abner, a simmalogda agingga iti labneng ti Jordan, a binallasiwda ti karayan, kalpasanna simmang-atda iti Ginget Jordan nga agingga kadagiti turod ti Galaad, a sadiay nagturongda nga agpa-Mahanaim. Kalpasan ti panangitabonda ken Asael idiay Betlehem (nalabit iti simmaganad nga aldaw), dagiti lallaki ni Joab nagmartsada iti agpatnag iti nasurok a 22 km (14 mi) a limmasat kadagiti bantay nga agturong iti Hebron.—2Sm 2:29-32.
Sinuportaran ni Abner ti kumapkapuy a turay ni Is-boset ngem pinatibkerna met ti bukodna a saad, nalabit tartarigagayanna ti agbalin nga ari uray ta isu ket kabsat met ti ama ni Saul. Idi binabalaw ni Is-boset gapu ta nakidenna iti maysa kadagiti kamalala ni Saul (maipalubos laeng nga aramiden ti pagtawiden ti natayen nga ari), sipupungtot nga imbaga ni Abner nga iyakarna ken David ti suportana. (2Sm 3:6-11) Nagisingasing ken David nga impaganetgetna ti bukodna a saad nga isu maibilang metten nga agturay iti intero nga Israel malaksid iti Juda. Idi napatgannan ti kalikagum ni David a maisubli ti asawana a ni Mical, napan nakisarita ni Abner a pribado kadagiti pannakaulo ti 11 a tribu a naisina iti Juda tapno pabilgenna ti panangpaborda iti ari a dinutokan ni Jehova, a ni David. (2Sm 3:12-19) Kalpasan dayta, isu sibabara nga inawat ni David iti kabeserana idiay Hebron, ket ni Abner pimmanaw met laeng iti dayta nga aldaw tapno guyugoyenna dagiti amin a tribu a makitulagda ken David. Ngem idi nakasublin ni Joab gapu ta awan idi ta napan nangrubbuot, imbagana a ni Abner ket maysa a mannakikumplot a managsimisim. Kalpasanna, pinagsublina a mismo ni Abner ket inallilawna nga inturongna iti kasasaad a mabalinna a papatayen.—2Sm 3:20-27.
Iti ipapatay ni Abner, nakeltay ti aniaman nga in-inanamaen a suporta ken Is-boset ket di nagbayag, ni Is-boset ket pinapatay dagiti mangliliput a lallaki. Babaen iti daytoy, naan-anay a nagpatingga ti panagturay ti balay ni Saul.—2Sm 4:1-3, 5-12.
Adu a tawen kalpasanna, idi umad-adanin ti mismo nga ipapatayna, nalagip ni David ti ipapatay ni Abner (kasta met ti ipapatay ni Amasa) ket pinarebbenganna ni Solomon a mangikkat iti mansa ti panagbasol iti dara nga inyeg ni Joab iti balay ni David. (1Ar 2:1, 5, 6) Di nagbayag kalpasan dayta, ti nangpapatay ken Abner a ni Joab ket napapatay iti bilin ni Solomon.—1Ar 2:31-34.
Maysa laeng nga anak ni Abner ti nailista, ni Jaasiel, a panguluen idi iti tribu ni Benjamin bayat ti panagturay ni David. (1Cr 27:21) Dakamaten met ti 1 Cronicas 26:28 dagiti kontribusion ni Abner maipaay iti tabernakulo manipud kadagiti samsam a naalana kas panguluen ti buyot.