BAALIS

Ari ti Ammon, a naipadamag nga imbaonna ni Ismael a mangpapatay ken Gobernador Gedalias ti Juda idi 607 K.K.P. Ti Griego a Septuagint ilanadna daytoy a nagan kas “Belisa.”​—Jer 40:14.

Adda natakuatan idi 1984 a maldit ti pangselio nga addaan iti nagan a Baʽalyishʽa kadagiti panagkabakab iti Tell el-ʽUmeiri idiay Jordan. Daytoy a maldit ti pangselio ket napetsaan iti naud-udi a paset ti maikapito a siglo K.K.P. sigun iti kadaanan a panagsurat. Iti kitikit nga adda sadiay a naisurat iti kadaanan a letra nga Ammonita, kastoy ti mabasa: “Kukua ni Milkomʼor [wenno, Milkomʼur], adipen ni Baʽalyishʽa.” Mabalin a ni Baʽalyishʽa ti Baalis nga adda iti Biblia.