BEELZEBUB

[mabalin a nabaliwan a porma ti Baal-zebub, kaipapananna ti “Makinkukua Kadagiti Ngilaw,” ti Baal a nagdaydayawan dagiti Filisteo idiay Ekron. No dadduma, agparang met kas Beelzeboul ken Beezeboul, mabalin a kaipapananna ti “Makinkukua iti Natan-ok a Pagyanan (Pagnaedan),” wenno “Makinkukua iti Ibleng” kas resulta ti pannakaay-ayam ti di Biblikal a Heb. a sao a zeʹvel (ibleng)].

Ti “Beelzebub” ket awag a nayaplikar ken Satanas a prinsipe wenno panguluen dagiti sairo. Sitatabbaaw nga impabasol dagiti panguluen ti relihion a parparuaren ni Jesu-Kristo dagiti sairo babaen ken Beelzebub.​—Mt 10:25; 12:24-29; Mr 3:22-27; Lu 11:15-19; kitaenyo ti BAAL-ZEBUB.