KAMPANILIA

Lungogan a metal a basehas. Daytoy a gamigam gagangay a sukog-peras wenno sinankopa, ken mangpataud iti natinggaw a nota ti musika no mapatit.

Ti damo a pannakadakamat dagiti kampanilia iti Biblia ket nainaig iti panagserbi iti tabernakulo iti libro ti Exodo, a mamimpito a pagparangan ti Hebreo a sao a pa·ʽamohnʹ. Iti gayadan ti bin-ig nga asul a lambon ti nangato a padi, naikapet dagiti nabalitokan a kampanilia nga iti nagbabaetan dagitoy, adda naibal-et a granada a naaramid iti asul, purpura, ken eskarlata a material.​—Ex 28:33-35; 39:25, 26.

Iti Zacarias 14:20 ti Hebreo a sao a metsil·lahʹ naaramat a mangipasimudaag kadagiti kampanilia a naikapet kadagiti guarnis dagiti kabalio. Nagtaud dayta iti sao a kaipapananna ti ‘sumgar.’ (1Sm 3:11) Ti pannakaikitikit ti sasao a “Ti kinasanto kukua ni Jehova” kadagitoy a kampanilia ti kabalio, ti isu met laeng a sasao a masarakan iti “sumilsilnag a plata” a naikapet iti turbante ti nangato a padi ti Israel, ipasimudaagna a ti tunggal banag mapno iti pannakaammo iti kinasanto ni Jehova.​—Ex 39:30, 31; idiligyo ti Zac 14:21.