BETSAIDA
[manipud Aramaiko, kaipapananna ti “Balay ti Mangnganup (wenno, Mangngalap)”].
Ti siudad a naggapuan da Felipe, Andres, ken Pedro (Jn 1:44), nupay da Simon Pedro ken Andres agparang a nagnaedda idiay Capernaum idi tiempo ti ministerio ni Jesus. (Mt 8:5, 14; Mr 1:21, 29) Maysa dayta a siudad “ti Galilea.” (Jn 12:21) Kalpasan ti ipapatay ni Juan a Manangbautisar, nagturong ni Jesus idiay Betsaida a kaduana dagiti adalanna, ket iti naiputputong a naruot a lugar iti aglawlaw, namilagruan nga impaayanna iti taraon ti agarup 5,000 a lallaki, malaksid kadagiti babbai ken ub-ubbing, a naguummong a dumngeg kenkuana. (Lu 9:10-17; idiligyo ti Mt 14:13-21; Jn 6:10.) Iti ruar ti Betsaida, insubli ni Jesus idi agangay ti panagkita ti maysa a bulsek a tao. (Mr 8:22) Yantangay dagitoy a mannakabalin nga ar-aramid ket napasamak iti aglawlawda, maikari laeng a maumsi dagiti amin nga umili ti Betsaida, agraman dagiti agnanaed iti Corazin, gapu ta saanda kayat ti agbabawi.—Lu 10:13.
Napagsusupiatan no sadino ti ayan ti “purok” (Mr 8:22, 23) wenno “siudad” (Lu 9:10) ti Betsaida. Dagiti panangtukoy ti Kasuratan ipatuldoda ti maysa a disso iti makin-amianan nga igid ti Baybay ti Galilea. Innaig ni Josephus daytoy a nagan iti maysa nga aduan-umili a purok a dayaen laeng ti disso a sumrekan ti Karayan Jordan iti Baybay ti Galilea. Ni Felipe a tetrarka tinarimaanna daytoy a purok ket napanaganan dayta iti Julias kas pammadayaw iti anak a babai ni Cesar Augusto. (Jewish Antiquities, XVIII, 28 [ii, 1]) Dagiti kadaanan a rebba ti disso ti mismo a Julias ket masarakan idiay et-Tell, agarup 3 km (2 mi) manipud baybay; nupay kasta, adda dagiti tedda ti basbassit a purok dagiti mangngalap a masarakan idiay el-ʽAraj iti mismo nga igid ti baybay. Maysa a nainkasigudan a pagsangladan ti ar-aramaten idi ditoy dagiti mangngalap agingga iti nabiit pay a tiempo, ngarud ti nagsaadan ti lugar maitutop iti kaipapanan ti nagan a Betsaida.
Nupay awatenda a daytoy a pakabigbigan ket agaplikar iti Betsaida iti sumagmamano a teksto, adu a komentarista ti mangirupir nga adda maikadua a Betsaida iti maysa a lugar iti laud ti Jordan. Daytoy a panangmatmat ket naibatay iti pannakaawat a ti pagpatinggaan ti teritoria ti Galilea saan a naglayon iti daya ti Jordan, sigun iti sasao ni Josephus ken ti dadduma pay. Ni Josephus a mismo dakamatenna nga adda ti Julias iti “makimbaba a Gaulanitis,” ti rehion iti daya ti Baybay ti Galilea. (The Jewish War, II, 168 [ix, 1]) Kaskasdi naikuna a ti Betsaida ket paset “ti Galilea.” (Jn 12:21) Nupay kasta, agparang a saan a kanayon a ti rehion ti Galilea ti eksakto a matuktukoy, yantangay tinukoy pay ketdi ni Josephus ti maysa a Judas a taga Gaulanitis kas “maysa a Galileano.” (Jewish Antiquities, XVIII, 4 [i, 1]; The Jewish War, II, 118 [viii, 1]) Posible met unay a ti sumagmamano nga umili ti siudad ti Betsaida nagnaedda agingga iti makinlaud a deppaar ti Jordan, nga agarup 1.5 km (1 mi) ti kaadayona.
Kanayonanna pay, yantangay ti patarus ti King James Version iti Marcos 6:45 kunaenna a binilin ni Jesus dagiti apostolna a “mapanda [babaen iti barangay] iti sabali a bangir sakbay nga agturongda idiay Betsaida,” idinto ta ti pumadpada a sasao iti Juan 6:17 ibagana a Capernaum ti papananda, patien ti sumagmamano nga adda la ketdi maikadua a Betsaida iti makinlaud a deppaar ti Jordan iti asideg ti Capernaum. Nupay kasta, maibatay kadagiti moderno a patarus ti teksto iti Marcos 6:45 maawatan a rinugian dagiti apostol ti panagdaliasatda idiay Capernaum babaen ti panangtaraigidda nga umuna iti baybay “nga agturong idiay Betsaida” (ti disso a nangpanawanda ken Jesus a nabatad nga asideg dayta iti nakapasamakan ti namilagruan a pannakapakan ti 5,000, nalabit iti abagatan pay ti Betsaida ken iti ballasiw ti baybay manipud Capernaum), ket kalpasanna bimmallasiwda iti makin-amianan nga ungto ti baybay, a nagturongda iti destinasionda, ti Capernaum. Simmangladda iti dapnis ti daga ti Genesaret, nalabit iti abagatan ti siudad ti Capernaum.—Mr 6:53.
Ngarud, nupay nadumaduma a lugar ti naikuna nga ayan ti maikadua a Betsaida, saanen a kasapulan daytoy kadagiti salaysay ti Biblia. Mapaliiw met a dagitoy a naikuna a disso asidegda amin iti Capernaum, ket nakaim-imposible a sumagmamano laeng a milia ti nagbaetan ti dua a siudad nga agnagan Betsaida.