BULBUL

[Heb., ʽa·ghurʹ].

Ti nagan ti adu a kita dagiti kalalainganna ti kadakkelda a kasla tordo a tumatayab a masarakan idiay Africa ken umabagatan nga Asia, agraman ti Palestina. Ti pakailasinan ti bulbul ket addaan iti ababa a tengnged, ababa a paypayak, ken atiddog nga ipus. Nupay ti adu a patarus ipatarusda ti ʽa·ghurʹ kas “teggaak,” ti panangtukoy ni Ezekias iti ‘panagan-anibaar’ ti tumatayab adayo a mangdeskribir iti nabangag nga agtangtangguyob nga uni a parnuayen dayta nagdakkel a tumatayab. (Isa 38:14) Ti Lexicon in Veteris Testamenti Libros (da L. Koehler ken W. Baumgartner, Leiden, 1958, p. 679) impatuldona ti ʽa·ghurʹ kas ti bulbul (Pycnonotus Reichenovi). Kuna ni Ludwig Koehler a ti Hebreo nga ʽa·ghurʹ deskribirenna ti maysa a tumatayab a ‘mangpatakder wenno mangpaseggar kadagiti dutdotna’ ket kunaenna maipapan iti bulbul a “bayat dagiti panagsarimadeng (ti panagkantana) ipangatona . . . sagpaminsan dagiti immatiddog a kasla tapingar a dutdot ti likudan ti ulo.” (Kleine Lichter [Aleman], Zurich, 1945, p. 38, 39) Maisupadi iti kasla nabangag nga uni ti teggaak, ti uni ti kanta ti bulbul ket kasla plauta ken nailadawan kas napagtipon nga anibaar ken samiweng.

Ni Jeremias (8:7) nabatad a tukoyenna ti naipanapanawen nga isasangpet dagiti agakar-akar a tumatayab iti panangtubngarna kadagiti Israelita iti saanda a pannakailasin iti tiempo ti panangukom kadakuada ti Dios.