KULANTRO, BUKEL TI

[Heb., gadh].

Ti manna a kinnan dagiti Israelita idiay let-ang naikuna a “puraw dayta a kasla bukel ti kulantro” (Ex 16:31), nabatad nga umarngi iti dayta saan laeng nga iti maris no di ket iti pakabuklan a langana.​—Nu 11:7.

Ti kulantro (Coriandrum sativum) ket tinawen a mula iti pamilia ti carrot wenno parsley, a dumakkel iti agarup 40 agingga iti 50 cm (16 agingga iti 20 pul.) a kangato, nga addaan iti bulbulong a kasla parsley ken pangindaraen wenno puraw a riprip-ong ti sabong. Ti bungana buklen ti nagtimbukel a bukbukel a dapul a puraw ti marisda ket 1 agingga iti 3 mm (0.04 agingga iti 0.12 pul.) ti baribarna. Ti bukbukel naglaon iti nasayamusom a lana nga addaan makaay-ayo a raman ken maar-aramat kas rekado, kasta met a pangagas kadagiti nalag-an nga an-annayen iti tian.

Ti bukel ti kulantro maus-usar idiay Egipto nanipud pay kadaanan a tiempo ket ngarud awan duadua a pagaammo unay dagiti Israelita sakbay ti Ipapanaw. Agtubo kas atap iti dayta a pagilian kasta met iti lugar ti Palestina.