DEDAN

1. Maysa a Cusita a nagtaud iti linia ni Raama. (Ge 10:7; 1Cr 1:9) Nalabit nagyan dagiti putotna iti maysa a paset ti Arabia.

2. Kaputotan ni Abraham babaen ken Jocsan. (Ge 25:3; 1Cr 1:32) Dagiti Dedanita a nagtaud ken Jocsan ket nalawag a nagyanda iti abagatan ken iti abagatan a daya ti Naikari a Daga iti met laeng lugar a nangibaonan ni Abraham iti amin a putotna babaen ken Ketura nga asawana.​—Ge 25:6.

Yantangay ti dua a pamilia dagiti Dedanita (pamilia ni Raama ken pamilia ni Jocsan) nabatad a nagyanda iti paspaset ti Arabia, adda panagduadua no siasino a Dedan ti tuktukoyen daytoy a nagan no agparang kadagiti naud-udi a surat iti Biblia. Nupay kasta, yantangay nainaig dayta no dadduma iti sabsabali pay a Semitiko nga il-ili a kas iti Edom, Tema, ken Buz, agparang a ti matuktukoy a Dedan isu ti putot ni Jocsan. Kas pagarigan, nailista ti Dedan kas adda iti ungto ti Edom a naikeddeng a marebbek ti dagana. (Eze 25:13) Naibaga met iti Dedan (nga adda “iti desierto a tanap”) nga agtalaw iti sanguanan dagiti rumaraut a puersa. Dagiti sangkakuyogan a managbiahe a Dedanita agkamangda iti kakaykaywan, idinto ta ti Tema (makinteritoria iti nalabit pagkamanganda) maayaban tapno mangipaay iti makan ken inumen kadagiti pugante. (Isa 21:11-15; Jer 49:8) Kas iti Edom, ti Dedan inton kamaudiananna mapilitan met nga uminom iti kopa ti arak ti pungtot ni Jehova.​—Jer 25:15, 21, 23.

Kunaen dagiti eskolar a ti Dedan ket isu ti nadam-eg nga ayan ti el-Ula, agarup 120 km (75 mi) iti abagatan a laud ti Taima.

Ti dadduma pay a pannakatukoy ti Dedan saanda nga iparipirip no ti matuktukoy ket Hamitiko wenno Semitiko nga ili. Kas pagarigan, nainaganan ti Dedan iti Ezequiel 27:15, 20 kas agtagtagilako a kadua ti Tiro. Ti Dedan siaagum met a paginteresanna ti panggep a panangsamsam ni Gog ti Magog maibusor iti ili ti Dios.​—Eze 38:13.