IKET A PAGDAKLIS

Iket a maiguyod manipud lansad ti danum ken maaramat a pagkalap iti ikan. (Eze 26:5, 14; 47:10) Iti kadaanan nga Egipto, dagiti iket a pagdaklis ket naaramid kadagiti lino a linas ken naikkan kadagiti padagsen a buli iti baba ken kaykayo a patapaw iti ngato. Mabalin nga umasping iti dayta dagiti iket nga inaramat dagiti Israelita.

Dagiti pamay-an iti panagaramat iti iket a pagdaklis idi un-unana ket nalabit kaasping unay dagiti pamay-an a nausar iti Makintengnga a Daya kadagiti kallabes a tiempo. Maitinnag daytoy nga iket manipud kadagiti barangay tapno mapalawlawan ti maysa a pangen ti ik-ikan, ket maipatakdang dagiti atiddog a tali a naikapet kadagiti agsumbangir nga ungto ti iket, ket ti sumagmamano a tattao iti agsumbangir a tali in-inut nga iguyodda nga ipatakdang ti iket kas sinan-arko. (Mt 13:47, 48) Ti sabali pay a pamay-an isu ti panamagsinnabet kadagiti ungto ti iket tapno maporma ti maysa nga umakikid a sinansirkulo. Kalpasanna, dagiti mangngalap bumatokda ket guyodenda ti makimbaba a paset a naikkan ti padagsen, iti kasta mangaramidda iti pannakalansad. Kalpasan daytoy, mayaon ti iket ken maikarga iti maysa a barangay wenno ad-adu pay. (Lu 5:6, 7) No dadduma, umuna a maiguyod ti iket ken maipan iti ab-ababaw a danum sakbay a maala ti nagyanna.​—Idiligyo ti Jn 21:8, 11.

Iti Kasuratan, piguratibo a naaramat ti iket a pagdaklis mainaig iti pannakaummong dagiti tattao. (Mt 13:47, 48) Naaramat met a pangiladawan iti puso ti imoral a babai (Ec 7:26) kasta met kadagiti gandat a mangsilo iti sabsabali. (Mik 7:2) Ti namilitariaan a panagparmek nayasping met iti panagkalap babaen iti iket a pagdaklis.​—Hab 1:15-17.