EMIM

[Nakaal-aliaw a Bambanag].

Tribu wenno tattao a nagnaed iti teritoria iti daya ti Natay a Baybay. Nadeskribirda kas dadakkel, nakaad-adu, ken natatayag “kas iti annak ni Anakim.” (De 2:10) Daytoy a pannakaidilig kadagiti annak ni Anak ipasimudaagna a dagiti Emim ket natatayagda ken narurungsotda a kasla higante, ta kinuna ni Moises iti Israel: “Sika nangngegmo a naikuna, ‘Siasino ti makapagtakder a sititibker iti sanguanan ti annak ni Anak?’” (De 9:2) Saan a masierto ti namunganayan dagiti Emim, nupay pagarupen ti dadduma a nagtaudda kadagiti Refaim.

Bayat ti tiempo ni Abraham, ti Elamita nga ari a ni Kedorlaomer inabakna dagiti Emim idiay Save-kiriataim. (Ge 14:5) Kalpasan daytoy a pasamak, nalawag a nagnaed pay dagiti Emim iti sumagmamano a tiempo iti dagada iti daya ti Natay a Baybay, ta kunaen ti Biblia nga idi agangay pinagtalaw idan dagiti Moabita. Inusar met dagiti Moabita ti nagan nga Emim a pangtukoy kadagiti Refaim.​—De 2:11.