EFRATA

[Kinabunga].

1. Ti asawa ni Caleb (Kelubai) nga anak ni Hezron a kameng ti tribu ni Juda. Nakiasawa ken Caleb bayat nga addada iti pannakaadipen idiay Egipto, kalpasan ti ipapatay ni Azuba nga asawa ni Caleb. Ni Efrata isu ti ina ni Hur ken idi agangay apong ni Bezalel iti tumeng, ti nasigo a tumatrabaho a pagaammo unay iti pannakaibangon ti tabernakulo.​—1Cr 2:9, 19, 50; 4:4; Ex 35:30-35.

2. Nabatad a daytoy ti immun-una a nagan ti Betlehem wenno maysa a nagan a nayaplikar iti lugar iti aglikmutna. Ti nagan a Betlehem ken Efrata ket agkadua a naaramat iti nadumaduma a teksto. Iti salaysay maipapan iti ipapatay ni Raquel, nadakamat nga isu “naitabon iti dalan nga agturong idiay Efrat [Efrata], kayatna a sawen, Betlehem.” (Ge 35:16, 19; 48:7) Dagiti kameng ti pamilia ni Elimelec naawaganda iti “Efrateo . . . manipud Betlehem,” ket idiay Betlehem ti nagsublian ti nabalo nga asawana a ni Noemi idi naggapu idiay Moab. (Ru 1:2, 19) Ti bendision a naisawang ken Boaz idi inasawana ni Ruth isu ti panangpaneknekna koma iti ‘pategna iti Efrata ken panangaramidna iti agdindinamag a nagan iti Betlehem.’ (Ru 4:11) Ket kamaudiananna, iti padto maipapan iti pannakayanak ti Mesias, dagitoy a nagan napagtiponda kas “Betlehem Efrata.” (Mik 5:2) Gapu itoy, agparang a ti pannakatukoy ti Efrata iti Salmo 132:6, a mangdakdakamat iti pannakaseknan ni David iti lakasa ti tulag, ket agaplikar met iti daytoy nga ili a nakayanakan ni David.​—Kitaenyo ti BETLEHEM Num. 1.