GERAR, NAAPRES A GINGET TI

Iti napalabas a tawtawen, naikuna a ti naapres a ginget ti Gerar isu met laeng ti Wadi esh-Shariʽah (Nahal Gerar), a dumalan iti agarup 0.5 km (0.3 mi) iti abagatan ti Tell Abu Hureirah (Tel Haror), ti nalabit ayan ti kadaanan a Gerar. Ti rehion iti aglawlaw ti naapres a ginget ti Gerar ket mayanatup unay kadagiti agpaspastor. Nabatad a nalaka ti makasarak iti danum sadiay babaen ti panagkali iti abut iti lansad ti ginget. (Ge 26:17-19) Temporario a nagnaed ni patriarka Abraham kas maysa a ganggannaet iti daytoy a rehion. (Ge 20:1, 2) Idi agangay, bayat ti maysa a nakaro a bisin, nagsubli ni Isaac iti daytoy a lugar. Ditoy a nagtalon ken nagtaraken kadagiti arban ken pangen. (Ge 26:1, 6, 12-14) Iti mismo a naapres a ginget, nangkali dagiti adipen ni Isaac iti dua a bubon a nakaigapuan ti pannakiriri kadakuada dagiti naagum a pastor ti Gerar.​—Ge 26:17-22.