GIBBETON

[Likud; Munturod].

Siudad nga orihinal a naituding iti tribu ni Dan (Jos 19:40, 41, 44) ngem idi agangay naited kadagiti Cohatita kas siudad dagiti Levita. (Jos 21:20, 23) Sinigsiglo kalpasanna, naadda ti Gibbeton iti im-ima dagiti Filisteo. Idi padpadasen ni Ari Nadab ti Israel nga agawen ti siudad manipud kadagiti Filisteo, isu pinapatay ti nakikumplot a ni Baasa. (1Ar 15:27) Agarup 24 a tawen kalpasanna, ti Gibbeton ket iturturayan dagiti Filisteo idi nagpakarso ni Omri a panguluen ti buyot ti Israel maibusor iti dayta a siudad. Idi a ti pakarso ti Israel nga adda sadiay indeklarada ni Omri kas ari, kellaat nga insardengna ti pananglakub iti Gibbeton tapno rautenna ti kasalisalna nga Israelita nga ari a ni Zimri.​—1Ar 16:15-18.

Kadawyan a maikunkuna a ti Gibbeton isu ti Tell el-Melat (Tel Malot), agarup 9 km (5.5 mi) iti amianan ti naikuna nga ayan ti Ekron a siudad dagiti Filisteo.