GILBOA

[mabalin a, Turod a Pagilian].

Maysa a bantay a kadawyanen a maikunkuna nga isu ti Jebel Fuquʽah, maysa a sinankumpay a pantok ti apug a bato a turturod nga adda iti abagatan a daya ti Tanap ti Jezrael ken iti laud ti Bet-sean. Nabingbingay dagitoy a kabambantayan iti sumagmamano a nangato a patag gapu kadagiti baw-ang. Kaaduan a pasetna ket langalang a bato, nga addaan iti tibbatibbakol a kankanal iti makin-amianan ken makinlaud a paspaset, a sadiay marmargaay dagiti tisa. Ngem mamulmulaan iti trigo ken sebada dagiti naundayas a darisdisna iti laud. Kasta met, adda dagiti masarakan sadiay a pagpaaraban, ken kaykayo a higos ken olibo. Ti makin-amianan a deppaar ti kapasdokan ken katayagan, nga addaan iti kangato nga agarup 520 m (1,700 pie) iti ngatuen ti patar ti baybay.

Gapu iti nagsayaat nga ayanna iti nadam-eg a Tanap ti Jezrael iti nagbaetan ti naapres a ginget ti Kison ken ti Ginget Jordan, nairaman ti Gilboa iti di kumurang a dua a dadakkel a gubat. Nagpakarso ni Gideon ken dagiti lallakina idiay “bubon ti Harod” a kadawyan a kunaen ti dadduma nga isu ti ubbog a masarakan iti makin-amianan a laud a dimmawadaw a turod ti Gilboa. (Uk 7:1) Idi agangay, inummong ni Ari Saul dagiti puersana iti Gilboa ket sadiay a naabakda iti im-ima dagiti Filisteo. Sadiay met a napapatay ti tallo nga annakna, da Jonatan, Abinadab, ken Malqui-sua, ken sadiay a nagpakamatay ni Saul.—1Sm 28:4; 31:1-4, 8; 2Sm 1:4-10, 21; 1Cr 10:1-8, 7