GUARDIA

Sakbay ti Kristiano a Kasuratan naadaw ti nombre a “guardia,” iti adu a gundaway, manipud Hebreo a berbo a sha·marʹ, kaipapananna ti “bantayan; salimetmetan.” (Ge 3:24; 17:9; 37:11; 1Sm 26:15) Dagiti trabahador iti pannakaibangon manen ti pader ti Jerusalem iti sidong ti panangiwanwan ni Nehemias nagserbida met kas guardia iti rabii. (Ne 4:22, 23) Ti ar-ari addaanda idi kadagiti tumataray a mangkuykuyog kadagiti karuaheda kas guardia, kas iti inaramid da Absalom ken Adonias idi a ti tunggal maysa pinadasna nga alaen ti trono ti Israel. (2Sm 15:1; 1Ar 1:5) Dagiti tumataray nagserbida iti sidong ni Ari Rehoboam kas agbambantay kadagiti ruangan ti palasio ken binantayanda dagiti napateg a gambang a kalasag. (1Ar 14:27, 28) Nagusar ni Nangato a Padi a Jehoiada kadagiti tumataray idiay templo, agraman dagiti Cariano a para-guardia, tapno salaknibanda ni agtutubo nga Ari Jehoas ken tapno papatayenda ni Athalia.​—2Ar 11:4-21; kitaenyo ti CARIANO A PARA-GUARDIA; TUMATARAY.

Ti Hebreo a sao a tab·bachʹ, naipatarus a “kosinero” iti 1 Samuel 9:23, gagangay a kaipapananna ti “manangparti” ken naaddaan iti kaipapanan a “manangdusa”; iti dadduma a teksto naaramat dayta mainaig iti para-guardia ni Faraon ti Egipto ken ni Ari Nabucodonosor ti Babilonia. (Ge 37:36; 2Ar 25:8, 11, 20; Da 2:14) Ti Hebreo a sao a mish·maʹʽath, gagangay a kaipapananna ti “managdengngeg” ken naipatarus a ‘sakup’ iti Isaias 11:14, naaramat a tumukoy iti para-guardia ni David (2Sm 23:23; 1Cr 11:25) ken iti para-guardia ni Saul, a ni David ti panguluen iti dayta.​—1Sm 22:14.

Kaugalian kadagiti pagbaludan ti Roma ti panangikawar iti balud iti maysa a soldado a guardia wenno, maipaay iti kaiingetan a kinatalged, iti dua a guardia kas iti napasamak ken Pedro. (Ara 12:4, 6) Bayat ti umuna a pannakaibalud ni apostol Pablo idiay Roma, naipaayan iti konsiderasion nga agnaed iti bukodna a maab-abangan a balay ken adda maysa a soldado a mangbantay kenkuana. (Ara 28:16, 30) Awan duadua a naing-inget ti maikadua a pannakaibaludna.

Tapno malapdan dagiti tattao a mangammo iti panagungar ni Jesus, dagiti panguluen a papadi pinasuksokanda dagiti Romano a guardia tapno isaknapda ti kinaulbod a dagiti pasurot ni Jesus tinakawda ti bagina.​—Mt 27:62-66; 28:11-15; kitaenyo ti SOLDADO.

Ti Romano a Guardia a Pretorio binuangay ni Cesar Augusto idi 13 K.K.P. tapno agserbi kas para-guardia ti imperio. (Fil 1:12, 13) Permanente a pinagpakarso ni Emperador Tiberio daytoy a guardia iti asideg dagiti pader ti Roma ket babaen kadakuada minedmedanna ti aniaman a kinagulo dagiti umili. Nangisinggalut daytoy iti dakkel a kinapateg iti komandante dagiti guardia, a ti puersana nagdagup iti agarup 10,000 a lallaki. Idi agangay bimmileg iti kasta unay ti Guardia a Pretorio ta agpadpada a nabalinanna ti mangisaad kadagiti emperador ken mangikkat kadakuada iti trono.

Naorganisar ti papadi ken dagiti Levita iti sidong dagiti kapitan tapno bantayanda ti templo idiay Jerusalem.​—Kitaenyo ti KAPITAN ITI TEMPLO.