IDUMEA

[manipud Griego, kaipapananna ti “[Daga] dagiti Edomita”].

Idi tiempo dagiti Macabeo ken dagiti Romano, ti sakup ti Idumea saanna a ramanen ti sentro ti kadaanan nga Edom, iti daya ti Araba, no di ket saklawenna ti sumagmamano a paset ti sigud a teritoria ti Simeon ken Juda. Kas impasimudaag ti Apokripal a libro ti Umuna a Macabeo (4:29, 61; 5:65, JB), saklawen ti Idumea ti rehion iti aglawlaw ti Hebron agingga iti Bet-zur iti amianan, agarup 26 km (16 mi) iti abagatan nga abagatan-a-laud ti Jerusalem. Naipadamag a nagsagaba dagiti Idumeano iti nakaro a pannakaabak iti im-ima ni Judas Macabeo. (1 Macabeo 5:3) Idi agangay, sigun ken Josephus, pinarmek ni Juan Hircanus I dagiti amin nga Idumeano, nga impalubosna nga agtalinaedda iti daga iti kondision nga agpakugitda ken annurotenda ti linteg dagiti Judio. Imbes a panawanda ti pagilian, nagtungpal dagiti Idumeano iti daytoy a kondision. (Jewish Antiquities, XIII, 257, 258 [ix, 1]) Dagiti agnanaed iti Idumea ket karaman kadagidiay mismo a napan ken Jesus apaman a nangngegda ti ‘adu a bambanag nga inar-aramidna.’​—Mr 3:8; kitaenyo ti EDOM, DAGITI EDOMITA.