KEDEMOT

[nagtaud iti sao a kaipapananna ti “daya”].

Ti nayawag iti maysa a siudad iti daya ti Jordan ken nalawag a tumukoy met iti let-ang iti aglikmutna. Manipud Let-ang ti Kedemot, nangibaon ni Moises kadagiti mensahero a mapan iti Amoreo a ni Ari Sihon, tapno agkiddaw iti pammalubos a lumasat iti dagana. (De 2:26, 27) Idi damo, ti Kedemot ket naited kadagiti Rubenita, idi agangay naituding daytoy kadagiti Merarita a Levita. (Jos 13:15, 18; 21:34, 36, 37; 1Cr 6:77-79) Kadawyan nga umanamong dagiti eskolar a mabalin nga isu dayta ti maysa kadagiti turod nga adda iti asideg ti rugi ti naapres a ginget ti Arnon, kas iti Qasr ez-Zaʽfaran, nga agarup 16 km (10 mi) iti amianan a daya ti maikunkuna nga ayan ti kadaanan a Dibon.