KENIZEO

[Ken (Kukua ni) Quenaz].

1. Kameng ti maysa a di Israelita a grupo ti tattao nga adda iti Canaan wenno iti asideg dayta. Inkari ni Jehova nga itedna ti teritoriada iti bin-i ni Abram. (Ge 15:18, 19) Agparang a naggapu dagiti Kenizeo iti abagatan a daya ket immakarda iti Negeb, a mabalin a nagwarasda iti maysa a paset ti Edom kasta met iti lugar a nagbalin a makin-abagatan a Juda, nga inaramidda dayta sakbay a pinarmek dagiti Israelita ti Naikari a Daga.

Ti sumagmamano nga eskolar inaigda dagiti Kenizeo ken Quenaz, maysa nga anak ni Elifaz ken shik ti Edom a nagtaud ken Esau. (Ge 36:15, 16) Gapuna, naibilang dagiti Kenizeo kas maysa a natan-ok nga Edomita a pamilia. Nupay kasta, di masigurado no ania a talaga ti nagan ti inapo dagiti Kenizeo yantangay ti mismo a Biblia awan linaonna a detalye maipapan itoy a banag. Idi tiempo ni Abram, dinakamat ni Jehova a karaman dagiti Kenizeo kadagiti tattao nga agnanaed iti teritoria a tagikuaento ti bin-i ni Abram (Ge 15:18, 19), gapuna saan a mabalin a kunaen a dagiti Kenizeo ket kaputotan ni Esau, a saan pay idi a nayanak.

2. Ti matalek a ni Caleb ket naawagan “anak ni Jefune a Kenizeo.” (Nu 32:12; Jos 14:6, 14) Mabalin a nagtaud ni Jefune iti maysa a di Israelita a Kenizeo (Ge 15:18, 19), a kimmuyog kadagiti kaputotan ni Jacob (Israel) ken nangasawa iti maysa nga Israelita a babai. Nupay kasta, nalablabit a ti termino a Kenizeo iti daytoy a kaso ket naggapu iti nagan ni Quenaz, pannakaulo ti maysa a pamilia a nagtaud ken Juda; umasping met iti dayta ti pannakatukoy ti kabsat ni Caleb.​—Jos 15:17; Uk 1:13; 1Cr 4:13.