LAUREL
[Heb., ʼoʹren].
Kayo a patinayon a berde ti bulongna, masansan a nababa laeng ngem makadakkel agingga iti agarup 15 m (50 pie). Ti intero a kayo (amin a bulbulong, ukis, ramramut, ken bungana) aglaon iti lana a nabayagen a maar-aramat kas medisina. Arinduyog ken arig-lalat dagiti bulongna, a nasilap ti rabawda.
Kaudian a nadakamat daytoy iti sumagmamano a kayo iti Isaias 44:14; dayta laeng ti pannakatukoy daytoy a kayo iti Hebreo a Kasuratan. Ti Lexicon in Veteris Testamenti Libros (da L. Koehler ken W. Baumgartner, Leiden, 1958, p. 88) inaigna ti Hebreo nga ʼoʹren iti kayo a laurel (Laurus nobilis), kasta met a kadawyan a maaw-awagan kas sweet bay tree. (Kitaenyo met ti The Interpreter’s Dictionary of the Bible, inurnos ni G. A. Buttrick, 1962, Tomo 2, p. 293.) Masarakan ti Laurus nobilis manipud dapnis nga agpangato iti kabambantayan iti tengnga ti Palestina ken agtubo met iti dadduma pay a pagilian ti Mediteraneo.
Ti bulbulong ti laurel ket ar-aramaten dagiti nagkauna a Griego iti panagaramidda kadagiti balangat, nga ikabilda iti ul-ulo dagiti nagballigi iti Pythiano a Paay-ayam ken naipaay met kadagidiay adda ik-ikutanna a saad kas simbolo ti kinatan-ok.