KIMAT

Ti nararaniag a gilap ti lawag a resulta ti pannakaibulos ti koriente ti atmospera iti nagbabaetan ti ul-ulep wenno iti nagbaetan ti ul-ulep ken ti daga. Daytoy a panagkimat a kakuykuyog ti bagyo a nabuyogan iti gurruod ket gagangay idiay Israel bayat dagiti natutudo a panawen ti primavera ken otonio, a masansan unay iti nalamiis a bulbulan ti Nobiembre wenno Disiembre.

Ni Jehova ti gubuayan dayta, yantangay isu ti Namarsua kadagiti elemento a kasapulan iti pannakapataud ti kimat. (Job 37:3, 11) Kabaelanna met a kontrolen dayta. Nalawag nga inaramatna ti kimat ken dagiti pamay-an a kaasping dayta tapno isalakanna dagiti adipenna manipud kadagiti kabusorda ken tapno ipakatna dagiti panangukomna. (2Sm 22:1, 15; Sal 18:14; 77:16-20; Zac 9:14; idiligyo ti Job 36:32; Sal 97:4; 144:6.) Mayanatup ngarud a nainaig dagiti kimat iti trono ti Dios (Apo 4:5; idiligyo ti Apo 11:19) kasta met kadagiti ebkas ti nadibinuan nga unget. (Apo 8:5; 16:18) Piguratibo a nailadawanda kas mangipadpadamag a nairingpasda ti annongda. (Job 38:35) Idiay Bantay Sinai, dagiti gilap ti kimat ket naipakuyog kadagiti nakaam-amak a pisikal a parangarang ti kaadda ti Dios.​—Ex 19:16; 20:18.

Ti kimat (Heb., ba·raqʹ) piguratibo a naaramat a mangiladawan iti sumilapsilap a napasileng a metal. (De 32:41, Rbi8 ftn; Eze 21:10, Rbi8 ftn; Na 3:3; Hab 3:11) Iti Nahum 2:4, ti sasao a “kas kadagiti kimat agtultuloyda nga agtaray” ket mabalin a tumukoy iti silap wenno iti kasta unay a kapartak dagiti karuahe ti kabusor nga adda kadagiti kalsada ti Nineve. Kasta met, dagiti naraniag a rupa wenno langa dagiti angheliko a parsua nayaspingda iti kimat.​—Da 10:5, 6; Mt 28:2, 3; kitaenyo met ti Eze 1:14.

Impakita ni Kristo Jesus a ti kaaddana saan a mabalin nga ilimed, no kasano nga imposible a mailimed ti kimat a “rummuar iti makindaya a paspaset ket agsilnag agingga iti makinlaud a paspaset.” (Mt 24:23-27; Lu 17:20-24) Immun-una ngem iti dayta, idi nagsubli dagiti imbaonna a 70 nga adalan a nangipadamag nga uray dagiti sairo naipasakup kadakuada babaen ti panagusar iti naganna, imparipirip ni Jesus a sigurado a mapagtalawto ni Satanas manipud langit, a kinunana: “Nangrugi a makitak a ni Satanas natnagen a kas kimat manipud langit.”​—Lu 10:1, 17, 18.

Iti Lucas 11:36 ti Griego a sao maipaay iti kimat (a·stra·peʹ) tumukoy iti lawag wenno panaggilap ti maysa a pagsilawan.