MALA

[nagtaud iti sao a kaipapananna ti “kumapuy; agsakit”].

1. Maysa kadagiti annak a babbai ni Zelofehad iti tribu ni Manases. Kiniddaw ni Mala ken ti kakabsatna a babbai a maited kadakuada ti tawid ni amada, ta ni amada ket awan annakna a lallaki no di lima nga annak a babbai laeng. Immuman ni Moises ken Jehova, nga inkeddengna a rebbeng a maited dayta iti annak a babbai ni Zelofehad. (Nu 26:28-33; 27:1-11) Inkalikagum ti simmaruno a bilin ni Jehova babaen ken Moises a ni Mala ken ti dadduma pay nga annak a babbai ni Zelofehad ket makiasawada laeng iti kameng ti tribu ni Manases, tapno ti tawidda ket saan a maipasa iti sabali a tribu. Isu a ni Mala ken ti kakabsatna ket “nagbalinda nga assawa ti annak ti kakabsat ni amada.” (Nu 36:1-6, 10-12) Daytoy a hudisial a pangngeddeng ket nagbalin a pangibatayan kadagiti sumarunonto a kaso maipapan iti tawid. (Nu 36:7-9) Idi agangay, dimmatagda iti saklang ni Eleazar a padi ken ni Josue, nga imbagada ti bilin ni Jehova, isu a naikkanda “iti tawid iti tengnga ti kakabsat a lallaki ni amada.”​—Jos 17:3, 4.

2. Maysa a kaputotan ni Manases a ti inana ket ni Hammoleket. Saan a naibaga no isu ket anak a lalaki wenno babai.​—1Cr 7:17, 18.