KANTERO

Nasigo a tumatrabaho nga agibangon babaen iti ladrilio wenno bato. (2Ar 12:12; 22:6) Kadagidi nagkauna a tiempo, ti kantero iti bato ket agtikap ken agragadi iti batbato ket kalpasanna usarenna dagita a pagibangon kadagiti pader ken nadumaduma a kita ti patakder. (2Sm 5:11; 1Ar 7:9-12; 1Cr 22:2; 2Cr 24:12) Ti karaman iti dadduma pay nga imbangbangonda ket dagiti lugar a pagitabonan (Isa 22:16) ken dagiti usok ti danum.​—2Ar 20:20.

Karaman kadagiti rimienta nga us-usaren idi dagiti kantero ket ti martilio, ti wasay, ti ragadi ti bato, ti alikamen a pangnibel, ti pagrukod a parteng, ken ti tinnag. (1Ar 6:7; 7:9; Isa 28:17; Zac 4:10) Kas makita kadagiti monumento, karaman iti ramramit nga inusar dagiti Egipcio a kantero ket maso ken paet, nga awan duadua nga inaramat met dagiti Israelita a kantero ti bato. Bayat ti panagibangon idiay Egipto, dagiti bato narukod ken namarkaan kadagiti nangisit nga uged, a nagserbi kas giya dagiti agtagtaga iti bato, ket tunggal bato naituding ti pakaikabilanna iti patakder babaen iti marka wenno numero a naikabil iti dayta.

Dagiti nagkauna a kantero kabaelanda a tabasan a nakasaysayaat dagiti bato ta saanen a nasken ti panagusar iti argamasa. Agingga itoy nga aldaw imposible ti panangisuksok iti tadem ti imuko iti nagbabaetan ti nagdadakkel a bato ti sumagmamano a tedtedda ti patakder idiay Palestina a napetsaan manipud Herodiano a periodo.​—Kitaenyo ti ARKITEKTURA.