BUOT

Iti pangkaaduan, aniaman kadagiti adu a sakit ti mula a patauden dagiti fungus. Ti pannakadadael dagiti apit babaen ti buot ket maysa kadagiti didigra a napasaran ti di matalek nga Israel. (De 28:22; 1Ar 8:37-39; 2Cr 6:28-30; Am 4:9; Hag 2:17) Naisingasing a ti buot iti Biblia mabalin a nangisit a ratik iti ungkay (Puccinia graminis). Daytoy nakaro a parasitiko a sakit lapdanna ti pananggun-od dagiti mula iti kasapulan a taraon ken danum ket ngarud pakaigapuan ti panaggango dagiti bagas ti bukbukel. Agparang ti babassit a maris-lati a turik kadagiti ungkay ken bulbulong dagiti naraut a mula a bukbukel.