NECO(H)

Maysa a faraon ti Egipto a kapanawenan ni Ari Josias ti Juda. Sigun iti Griego a historiador a ni Herodotus (II, 158, 159; IV, 42), ni Necos (Neco) ket anak ni Psammetichus (Psammetichos, Psamtik I) a nangsuno ken amana kas agturay iti Egipto. Nupay rinugianna ti panagaramid iti maysa a kanal a mamagsilpo iti Nilo ken iti Nalabaga a Baybay, saanna a nairingpas daytoy a proyekto. Nupay kasta, nangibaon iti maysa a bunggoy dagiti taga Fenicia nga aglayag iti aglikmut ti Africa. Daytoy a panaglayag ket sibaballigi a nairingpas iti tallo a tawen.

Idi arinunos ti 31-tawen a panagturay ni Josias (659-629 K.K.P.), nagturong idin ni Faraon Neco idiay karayan Eufrates tapno tulonganna dagiti Asirio. Iti daydi a tiempo, di inkankano ni Josias ti “sasao ni Neco manipud iti ngiwat ti Dios” ket nasugatan iti nakaro nga isu ti impatayna idi ginandatna a pagsanuden dagiti puersa dagiti Egipcio idiay Megiddo. Kalpasan ti agarup tallo a bulan, kinautibo ni Faraon Neco ni Jehoacaz, ti suno ni Josias iti trono, ket pinagbalinna a basaliona ti 25 ti tawenna a ni Eliakim, sana sinukatan iti Jehoiaquim ti nagan ti baro nga agturay. Nangipataw met ni Neco iti nadagsen a multa iti pagarian ti Juda. (2Cr 35:20–36:4; 2Ar 23:29-35) Kalpasan ti tallo a tawen wenno agarup uppat a tawen (625 K.K.P.), naabak idiay Carquemis dagiti puersa ni Neco iti im-ima dagiti taga Babilonia iti sidong ti panangidaulo ni Nabucodonosor.​—Jer 46:2.