OBED-EDOM
[kaipapananna ti “Adipen ni Edom”].
1. Maysa a Gitita nga iti pagtaenganna ti nakaidulinan ti lakasa ti tulag iti tallo a bulan kalpasan ti gistay pannakapattog dayta ken ti pannakatay ni Uzzah gapu iti dayta. Bayat ti kaadda sadiay ti lakasa ti tulag, bembendisionan ni Jehova da Obed-edom ken ti sangakabbalayanna, ket idi naammuan daytoy ni David, impagarupna a pagilasinan dayta nga umanamong ni Jehova a maipan idiay Jerusalem ti sagrado a baul.—2Sm 6:10-12; 1Cr 13:13, 14; 15:25.
Ni Obed-edom ket “Gitita.” Gagangay a pangawag daytoy iti maysa a Filisteo idiay Gat, ngem mabalin met a tumukoy iti asinoman a nagtaud iti Gat-rimmon, maysa a siudad dagiti Levita a naituding kadagiti Cohatita nga adda dayta iti teritoria ti Dan. (Jos 21:20, 23, 24) Sigurado nga isu ket Levita gapu ta naitalek kenkuana ti panangaywan iti Lakasa, ngarud isu ket Gitita manipud Gat-rimmon imbes a Filisteo a Gitita manipud Gat.
Namin-adu a nadakamat ti nagan nga Obed-edom a karaman kadagiti Levita a musikero ken agay-aywan iti ruangan iti Davidiko a periodo. Di nakurkurang ngem dua nga Obed-edom ti nadakamat (1Cr 15:21, 24; 16:38), ngem malaksid iti daytoy, saanen a masigurado no siasino kadakuada ti Obed-edom a tuktukoyen ti dadduma pay a teksto, wenno adda pay dadduma nga Obed-edom a kapanawenanda. Gapuna, mabalin a ni Obed-edom a Gitita ket isu met laeng ti Num. 2 wenno Num. 3.
2. Musikero ken agay-aywan iti ruangan a kimmuyog iti martsa a nangipan iti Lakasa idiay Jerusalem. (1Cr 15:18, 21) Nalabit isu ti musikero a nagtultuloy nga agserbi iti sanguanan ti tolda ti Lakasa idiay Jerusalem. (1Cr 16:4, 5, 37, 38a) Posible nga isu met laeng ti Num. 1.
3. Agay-aywan iti ruangan a kimmuyog iti isu met laeng a martsa. (1Cr 15:24) Mabalin met nga isu ti “anak ni Jedutun.” (1Cr 16:38b) Posible nga isu met laeng ti Num. 1 wenno Num. 4.
4. Maysa a Korita a kameng ti permanente a benneg wenno grupo dagiti agay-aywan iti ruangan a naituding a mangguardia iti makin-abagatan a sikigan dagiti arubayan ti santuario idiay Jerusalem, kaduana ti 62 a kakabagianna.—1Cr 26:1, 4-8, 13, 15; kitaenyo ti Num. 3.
5. Agay-aywan kadagiti balitok, pirak, ken sabsabali pay nga aruaten iti balay ni Jehova bayat ti panagturay ni Ari Amazias. Ngem naipan idiay Samaria amin dagitoy a sanikua a nalabit karaman pay ni Obed-edom a mismo, idi a ni Jehoas ti Israel sinerrekna ti Jerusalem maysa a tiempo iti nagbaetan ti 858 ken 844 K.K.P.—2Cr 25:23, 24.