FILIPOS
Idi tiempo ti maikadua a panagdaliasat ni apostol Pablo kas misionero, daytoy a siudad ti “kangrunaan [wenno, umuna] a siudad ti distrito ti Macedonia,” nupay nalawag a saanna a kabesera. Masarakan dayta iti makindaya a paset ti distrito, iti makin-amianan nga ungto ti Baybay Aegeano, saan unay nga adayo iti distrito ti Thrace. Nagbarko ni Pablo manipud Troas ket simmanglad iti pagsangladan nga ili ti Filipos, ti Neapolis. Kalpasanna, nagdaliasat iti agarup 15 km (9.5 mi) nga agturong iti amianan a laud a dimmalan iti Via Egnatia, wenno Kalsada Egnatia, ti dakkel a dalan ti komersio ken militaria manipud Asia agingga iti Roma, a limmasat iti maysa a bessang nga agarup 500 m (1,600 pie) iti ngatuen ti patar ti baybay ken sumalog iti Tanap ti Filipos.—Ara 16:11, 12.
Ti siudad ket adda iti maysa a turod nga agpangato manipud iti tanap, iti asideg ti karayan Gangites. Iti abagatan, adda nakalawlawa nga aluguog. Ti acropolis ti Filipos ket nagsaad iti dakkel a bato iti makin-amianan a daya a paset ti siudad. Ipakita dagiti nakabakab a rebrebba a ti Kalsada Egnatia ket limmasat iti tengnga ti siudad ket iti igid dayta adda kalalaingan ti kadakkelna a pagdadaponan. Ti Amfipolis, a nagdaliasatan ni Pablo kalpasan ti ipapanawna iti Filipos, ket nalawag nga isu ti kabesera ti distrito; adda iti agarup 50 km (30 mi) iti abagatan a laud ti Filipos. Manipud Amfipolis, nagturong ni Pablo iti abagatan a laud nga agarup 35 km (22 mi) nga agingga iti Apolonia ket manipud sadiay nagturong iti Tesalonica nga agarup 45 km (28 mi) iti laud, a nagnaedanna iti agarup tallo a lawas sakbay a nagturong iti abagatan a laud a limmasat iti Berea tapno lumugan iti barko nga agpa-Atenas.
Pakasaritaan. Crenides (Krenides) ti sigud nga awag iti Filipos. Ni Felipe II ti Macedon (ama ni Alejandro a Dakkel) inagawna daytoy a siudad manipud kadagiti taga Thrace idi agarup ngalay ti maikapat a siglo K.K.P. ket pinanagananna dayta iti naganna. Adda dagiti pagminasan iti naruay a balitok iti dayta a lugar, ket napataud dagiti sinsilio a balitok nga addaan iti nagan ni Felipe. Idi agarup 168 K.K.P. ti Romano a konsul a ni Lucius Aemilius Paulus pinarmekna ni Perseus, ti kaudian kadagiti ar-ari ti Macedonia, ket innalana ti Filipos ken ti teritoria iti aglikmut. Idi 146 K.K.P. ti intero a Macedonia ket napagmaymaysa a nagbalin a probinsia ti Roma. Napasamak iti Tanap ti Filipos (idi 42 K.K.P.) ti gubat a nangparmekan da Octavian ken Mark Antony kadagiti buyot da Brutus ken Gaius Cassius Longinus, ti dua a nangpapatay ken Julio Cesar. Kalpasanna, kas panglaglagip iti dakkel a panagballigina, ti Filipos ket pinagbalin ni Octavian a “kolonia” ti Roma. (Ara 16:12) Sumagmamano a tawen kalpasanna, idi a ni Octavian ket pinagbalin ti senado ti Roma kas Cesar Augusto, inawaganna ti ili iti Colonia Augusta Julia Philippensis.
Gapu ta naawaganen a kolonia ti Roma saanen nga agbuis ti siudad ken naipaayan iti dadduma pay a pribilehio, a nalabit karaman ti panagbalin a segundario nga umili ti Roma dagiti agnanaed iti dayta. Isu a dagiti umili ket ad-adda a simminged ken simmungdo iti Roma ngem saan koma a kasta no sabali ti napasamak. Mabalin a daytoy ti makagapu no apay nga idi inakusaranda da Pablo ken Silas, kasta ti impaganetget dagiti appo ti babai a nangparuaran ni apostol Pablo iti maysa a sairo ti panagpadles idi kinunada iti sanguanan dagiti mahistrado, “Taga Romatayo.” (Ara 16:16-24) Matarusan met unay dagiti Kristiano a taga Filipos no apay a nagsurat ni Pablo idi agangay ket binagbagaanna ida nga “agtignayda kas umili” a maikari iti naimbag a damag ti Kristo, ken pinalagipanna ida a “ti pannakipagilitayo adda iti langlangit,” ta iti lubong, ti pannakipagili iti Roma maipatpateg unay idiay Filipos, maipagpampannakkel pay ketdi.—Fil 1:27; 3:20, Int.
Isasarungkar ni Pablo. Naaddaan ti Filipos iti pribilehio kas kaunaan a siudad idiay Europa a makangngeg iti panangikasaba ni Pablo iti naimbag a damag, idi agarup 50 K.P., bayat ti maikadua a panagdaliasatna kas misionero. Napan sadiay kas panangipangagna iti nasirmatana iti rabii bayat nga adda idiay Troas iti Asia Menor, a ti maysa a lalaki a taga Macedonia nagpakaasi kenkuana: “Umallatiwka iti Macedonia ket tulongannakami.” (Ara 16:8-10) Iti sumagmamano nga aldaw nagyan sadiay ni Pablo ken ti kakaduana, a nabatad kaduada met ti mannurat iti aramidda a ni Lucas, ket iti Sabbath ‘napanda iti ruar ti ruangan iti igid ti maysa a karayan,’ a sadiay “impagarupmi nga adda disso a pagkararagan,” kinuna ni Lucas. Pagarupen ti dadduma nga awan ti sinagoga idiay Filipos, gapu iti namilitariaan a kasasaad ti siudad—a nalabit naparitan dagiti Judio sadiay nga aguummong iti uneg ti siudad maipaay iti panagdaydayaw. Aniaman ti kasasaad, nakisarita ni Pablo kadagiti babbai a naguummong sadiay ket nasarakanna ti maysa a babai, agnagan Lidia, managdaydayaw iti Dios, a ‘nanglukat a silalawa iti pusona tapno imdenganna ti bambanag a sasawen ni Pablo.’ Isu ken ti sangakabbalayanna nabautisaranda, ket kasta unay ti panangtagipateg ken kinamanagpadagusna ta ‘impapilitna pay nga umay agyan iti balayna da Pablo ken ti kakaduana.’—Ara 16:11-15.
Ngem itan, kalpasan ti panangipangagna iti ayab a mapan iti Macedonia, naipasango ni Pablo iti pannakaidadanes iti daytoy kaunaan a siudad, ngem saanen a dagiti Judio ti nagtaudanna, kas iti napasamak idi idiay Galacia. Nangngeddeng dagiti mahistrado ti siudad maibatay kadagiti ulbod a pammabasol dagiti makinkukua iti babai nga adda sairona. Napukawda ti sapulda gapu ta saanen a kabaelan ti babai nga itultuloy ti panagpadlesna, a dayta idi ti bimmaknanganda. Napangpang-or da Pablo ken Silas, naipisokda iti pagbaludan, ken naitul-ong dagiti sakada.—Ara 16:16-24.
Nupay kasta, iti katengngaan ti rabii, bayat nga agkarkararag ken idaydayawda ti Dios babaen iti kanta, a mangmangngeg ti dadduma pay a balud, adda napasamak a milagro. Napugsat dagiti paraut dagiti balud ken naluktan dagiti ruangan gapu iti maysa a ginggined. Yantangay ammo ti manangibalud a sanguenna ti dusa nga ipapatay gapu ta nakaluk-at dagiti naitalek kenkuana a balud, agpakamatay koman idi impukkaw ni Pablo: “Dika saktan ta bagim, ta addakami amin ditoy!” Kalpasanna nagimdeng ti manangibalud ken ti sangakabbalayanna kada Pablo ken Silas, inagasanda dagiti sugat dagitoy a gapuanan ti saplit, ket nagbalinda a bautisado a manamati.—Ara 16:25-34; LADAWAN, Tomo 2, p. 749.
Kabigatanna, nalabit nangngeg dagiti mahistrado ti siudad maipapan iti napasamak a milagro, isu nga imbilinda iti manangibalud a luk-atanna ni Pablo. Ngem napatpateg ken Pablo ti pannakaitandudo, pannakaidepensa, ken legal a pannakaipasdek iti naimbag a damag ngem iti madagdagus a pannakaluk-atna. Saan a timmulok iti aniaman a nalimed a pannakaluk-at tapno laeng saan a maibabain dagiti mahistrado. Impakaammona nga isu ket umili met iti Roma ken ti inaramidda a publiko a panangbautda kadakuada ken Silas, nupay saanda a nasentensiaan. Saan la ketdi! no di ket masapul a sipapanayag nga aklonenda nga isuda ti saan nga umiso ti inaramidna, saan ket a dagiti Kristiano. Idi mangngegda a Romano da Pablo ken Silas, nagbuteng dagiti mahistrado ket idi immaydan a mismo “nagpakaasida kadakuada,” inruarda ida, ket kiniddawda a pumanawda iti siudad.—Ara 16:35-40.
Nupay kasta, nakaipasdek ni Pablo iti maysa a nasayaat a kongregasion idiay Filipos, kongregasion a kanayon a napateg unay kenkuana. Makita ti panagayatda kenkuana babaen iti kasta unay a pannakaseknanda ken panangipaayda iti kasapulanna, uray pay adda iti sabali a lugar. (Fil 4:16) Simmarungkar manen ni Pablo iti Filipos bayat ti maikatlo a panagdaliasatna kas misionero ken nalabit iti maikatlo a gundaway, kalpasan ti pannakaluk-atna iti umuna a pannakaibaludna idiay Roma.—Ara 20:1, 2, 6; Fil 1:19; 2:24.