KAASI
Nadungngo a rikna maipaay iti tattao nga agsagsagaba wenno agkasapulan, wenno maipaay iti aniaman a mabalin a natrato iti naulpit a pamay-an. Ti pangadu ti pormana a nombre a ra·chamimʹ ipasimudaagna ti “kaasi,” “asi,” wenno “makin-uneg a rikrikna.” (Ge 43:14, 30; 1Cr 21:13; Sal 40:11; kitaenyo ti ASI.) Iti Griego, ti berbo nga splag·khniʹzo·mai kaipapananna ti “sumnek ti asina wenno matignay a mangngaasi,” “maasian.” Daytoy a termino naadaw iti nombre nga splagʹkhna, literal a kaipapananna ti “bagis.” (Ara 1:18) Yantangay dagiti napalaus nga emosion mabalin nga adda epektoda iti paset ti bagi nga ayan ti tian, ti Griego a nombre nga splagʹkhna masansan a maaramat a mangipasimudaag iti “kinalailo,” wenno “nadungngo a panangngaasi.”
Ni Jehova a Dios impasdekna ti pagulidanan iti panangiparangarang iti kaasi kadagidiay marigrigatan, ket tignayenna dagiti tattao tapno ipakitada daytoy a managayat a rikna. Mayanatup ngarud a ni Ari Solomon maikararagna a ni Jehova pagbalinenna dagiti Israelita a makaasian iti sanguanan dagiti nangkautibo kadakuada no agbalinda idi a kautibo gapu iti di kinamatalek. (1Ar 8:50) No maipapan iti sungbat iti daytoy a nainkararagan a kiddaw, insurat ti napaltiingan a salmista: “Ipalubosna nga agbalinda a makaasian iti sanguanan dagidiay amin a mangik-ikut kadakuada kas kautibo.” (Sal 106:46) Gapuna, ti maysa a nagbabawi a natda insubli ni Jehova iti dagada idi agangay. (Jer 33:26; Esd 1:1-4) Ket maitunos iti pagayatan ni Jehova, ni Ari Artaxerxes nangipaay ken Nehemias iti pammalubos nga ibangonna manen ti siudad ti Jerusalem.—Ne 1:11–2:6.
Naan-anay nga inyanninaw ni Jesu-Kristo ti personalidad ni Amana iti panangiparangarang iti kaasi. “Simnek ti asina” kadagiti bunggoy, uray pay no nasinga ti panagpaknina, “agsipud ta nalalatan ken naiwarawarada a kasla karkarnero nga awanan pastor.” (Mt 9:36; Mr 6:34) Simnek ti asi ni Jesus iti pannakakitana iti tattao a naulila wenno agkukutel wenno bulsek, iti kasta impaayanna ida iti namilagruan a pannakapabang-ar. (Mt 14:14; 20:30-34; Mr 1:40, 41; Lu 7:12, 13) Ket gapu iti kaasina kadagiti tattao a nakikadkadua kenkuana iti tallo nga aldawen nga awan makanda, natignay ti Anak ti Dios a mangipaay kadakuada iti taraon iti namilagruan a pamay-an.—Mt 15:32-38; Mr 8:2-9.
Matulad dagiti adalan ni Jesu-Kristo ti ulidanna ken ti ulidan ni Amana babaen ti sitatallugod ken siraragsak a panangipaayda iti tulong kadagidiay marigrigatan; kasta met, babaen ti panangabrasada kadagidiay amin a sipapasnek a pagbabawyanda ti basolda ken mangaramid iti amin-puso nga isusubli ken Jehova. (Mt 18:21-35; Lu 10:30-37; 15:11-32) Iti kasta makainanamada iti agtultuloy nga asi kadakuada ti Mannakabalin-amin.—Mt 5:7.