SAPLIT

Ti Hebreo a sasao a naipatarus a “saplit” wenno “pannaplit” ket literal a kaipapananda ti “panangsagid,” “panangkabil,” “danog,” “pannakaabak,” ken “ipapatay.” Nangipagteng ni Jehova a Dios kadagiti didigra kas dusa iti rebelioso a panagtanabutob (Nu 16:41-50), saan a panagtungpal iti pagayatanna (Zac 14:12, 15, 18), natabbaaw a panangaramat iti maysa a banag a sagrado (1Sm 5:1–6:4), panangsagid kadagidiay pinulotanna (Ge 12:17; Sal 105:15), ken di kinamatalek wenno panagsalungasing iti lintegna (Le 26:21; Nu 14:36, 37; 31:16; De 28:59-61; 1Cr 21:17, 22; 2Cr 21:12-15). Dagiti kasta a didigra ket mabalin nga ipakat ti anghel wenno tao. (2Sm 24:17; Jer 19:1-8; 25:8, 9; 49:17; 50:13, 14) Tapno maikkat dagiti saplit nga impagteng ti Dios, kasapulan a bumallaet dagiti adipen ni Jehova babaen iti kararag wenno naimpusuan nga agbabawi ken napasnek nga agkarkararag dagiti tattao.​—Ge 20:17, 18; 1Ar 8:37, 38; 2Cr 6:28, 29.

Ti saplit ket mabalin met a gapu iti basol ti maysa a tao. (Pr 6:32, 33) Mabalin a dayta ket sakit, kas iti “saplit a kukutel” (Le 13:2), wenno panagrigat maigapu iti panawen ken kasasaad.​—Sal 38:11; 73:5, 14.

Dagiti saplit nga impagteng ni Jehova iti Egipto idi tiempo ni Moises ket pammaneknek ti dakkel a pannakabalinna ken dayta ti makagapu no apay a naammuan dagiti nasion ti naganna. (Ex 9:14, 16) Kalpasan daytoy a pasamak, pinagsasaritaan pay laeng dagiti simmarsaruno a kapkaputotan dagiti epekto dagitoy a saplit. (Jos 2:9-11; 9:9; 1Sm 4:8; 6:6) Kasta met, pinaneknekan dagitoy a saplit nga awan pannakabalin ti didios ti Egipto.​—Ex 12:12; Nu 33:4; kitaenyo ti DIDIOS KEN DIDIOSA (Ti Sangapulo a Saplit); MOISES (Iti Sanguanan ni Faraon ti Egipto).

Dagiti saplit wenno pannaplit (Gr., ple·gaiʹ, iti literal, “danog wenno kabil”) a nadakamat iti libro ti Apocalipsis ket nabatad nga ebkas ti unget ti Dios ken simboliko a tumukoyda iti ibunga wenno epekto dagiti hudisial a pangngeddengna.​—Apo 9:18, 20; 11:6; 15:1, 6, 8; 16:9, 21; 18:4, 8; 21:9; 22:18.