REFAIM, NABABA A TANAP TI

Nalawa a tanap wenno ginget iti asideg ti Jerusalem. Mabalin a naala ti nagan daytoy a lugar kadagiti natayag a tattao a napanaganan iti Refaim a mabalin a nagnaed idi sadiay. Nailanad dayta kas maysa a beddeng iti nagbaetan dagiti teritoria ti Juda ken Benjamin. (Jos 15:1, 8; 18:11, 16) Adda iti makin-amianan nga ungtona ti maysa a bantay wenno pantok a simmango iti Ginget ti Hinnom. Nabayagen a maikunkuna a ti Nababa a Tanap ti Refaim ket isu ti tanap ti Baqaʽ iti abagatan a laud ti nagsaadan ti templo. Sumalog dayta iti agarup 1.5 km (1 mi) ket kalpasanna umakikid nga agturong iti Wadi el Werd (Nahal Refaʼim).

Makaay-ayo dayta kadagiti Filisteo agsipud ta nadam-eg (Isa 17:5) ken asideg iti Jerusalem ken Betlehem. (2Sm 23:13, 14; 1Cr 11:15-19) Kalpasan a napulotan ni David kas ari iti Israel, rimmubbuot dagiti Filisteo iti Nababa a Tanap ti Refaim. Nupay kasta, tinungpal ni David ti panangiwanwan ti Dios ket inabakna ida.​—2Sm 5:17-25; 1Cr 14:8-17; kitaenyo ti BAAL-PERAZIM.