PANAGDAIT

Panamagsasaip babaen iti maysa a kita ti dait. Sipud pay idi un-unana, ti panagdait ken panagborda, ket nagbalin a maysa a napateg a paset iti ar-aramid ti tattao. (Ex 26:1; 35:35; Job 16:15; Ec 3:7; Eze 13:18) Ti immuna a lalaki ken babai, da Adan ken Eva, ‘nagdaitda iti bulbulong ti higos ket nagaramidda kadagiti abbong ti lomo.’ (Ge 3:7) Mabalin a kaipapanan laeng daytoy a pinagsasaipda ti dadakkel a bulong ti higos babaen ti panagaramatda iti babassit a sanga ti kayo a higos.

Idi inlawlawagna no apay a saan a nagayunar dagiti adalanna a kas iti inaramid dagiti Fariseo ken dagiti adalan ni Juan, impatuldo ni Kristo Jesus a ti panangidait iti maysa a retaso ti di kimsen a lupot nga itakup iti daan a kawes pakaruenna laeng ti pigis. (Mr 2:18, 21) Inton malabaanen, kumsen ti naitakup a lupot ket guyodenna ti daan a kawes, a mangpisang iti dayta. Daytoy a pangngarig ti nakatulong koma kadagidiay dimngeg iti sasao ni Jesus tapno matarusanda a tiempon nga agbalinda a paspasurotna, kasta met a di umiso a pilitenda dagiti adalan ni Jesus a sumurot iti kaugalianda. Sakbay daytoy, inlawlawagen a mismo ni Juan a ti trabahona ket isagana ti iyaay ni Kristo, ngarud, temporario laeng dayta.​—Jn 3:27-30.