SIMON

[nagtaud iti Heb. a sao a kaipapananna ti “denggen; imdengan”].

1. Ni Simon Iscariote, ama ti nangliput ken Jesus a ni Judas.​—Jn 6:71; 13:2, 26.

2. Sabali pay a nagan maipaay ken apostol Pedro.​—Mr 3:16; kitaenyo ti PEDRO.

3. Apostol ni Jesu-Kristo, saan nga isu ni Simon Pedro kas ipakita ti termino a “Cananeo.” (Mt 10:4; Mr 3:18) Nupay nalabit naikameng met idi ni Simon iti Napeklan, gunglo dagiti Judio a bumusbusor kadagiti Romano, ti pannakaawagna iti “naregta,” wenno “napeklan” ket mabalin a maigapu ketdi iti narelihiosuan a kinaregtana.​—Lu 6:15, Rbi8 ftn; Ara 1:13.

4. Ub-ubing a kabsat ni Jesus iti ina. (Mt 13:55; Mr 6:3) Nupay saan pay laeng a manamati sakbay ti Piesta dagiti Tabernakulo idi 32 K.P. (Jn 7:2-8), nalabit nagbalin nga adalan idi agangay. Karaman dagiti nainlasagan a kakabsat ni Jesus iti bunggoy ti agarup 120 nga adalan idiay Jerusalem bayat ti panawen ti Pentecostes 33 K.P., nupay saan nga espesipiko a nainaganan ni Simon kas adda sadiay.​—Ara 1:14, 15.

5. Maysa a Fariseo a makimbalay iti nakipanganan ni Jesus. Sadiay, adda maysa a managbasol a babai a nangipakita kenkuana iti dakkel a kinamanagayat ken panagraem, ta sinapsapuanna dagiti saka ni Jesus iti bangbanglo a lana.​—Lu 7:36-50.

6. Maysa nga agnanaed idiay Betania, nadakamat nga “agkukutel” (nalabit inagasan ni Jesus), a makimbalay iti nanganan ni Kristo ken dagiti adalanna, kasta met ti napagungar a ni Lazaro ken ti kakabsatna a babbai a da Maria ken Marta. Sadiay a ni Maria sinapsapuanna ni Jesus iti nangina a bangbanglo a lana.​—Mt 26:6-13; Mr 14:3-9; Jn 12:2-8.

7. Maysa a katutubo iti Cirene ken ama da Alejandro ken Rufo. Iti ilalabas ni Simon a naggapu iti away, pinilitda nga agserbi ket tumulong a mangawit iti pagtutuokan a kayo ni Jesus.​—Mt 27:32; Mr 15:21; Lu 23:26; kitaenyo ti CIRENE, TAGA CIRENEO.

8. Maysa a managsalamangka iti siudad ti Samaria a namagsiddaaw unay iti nasion babaen kadagiti arte ti panagsalamangkana ta kinuna dagiti tattao maipapan kenkuana: “Daytoy a tao isu ti Pannakabalin ti Dios, a mabalin a maawagan Dakkel.” Gapu iti ministerio ni Felipe, ‘nagbalin a manamati’ ni Simon ket nabautisaran. Kalpasanna, idi a dagiti manamati immawatda iti nasantuan nga espiritu babaen ti panangipatay kadakuada da apostol Pedro ken Juan iti im-imada, imparangarang ni Simon ti di umiso a motibo ta nangitukon iti kuarta tapno maipaayan iti autoridad a maaramatna tapno dagidiay pangipatayanna iti imana ket umawat met iti nasantuan nga espiritu. Siiinget a binabalaw ni Pedro, nga imbagana ken Simon a ti pusona saan a nalinteg iti imatang ti Dios ket indagadagna kenkuana nga agbabawi ken agkararag tapno mapakawan. Kas tignayna, kiniddaw ni Simon kadagitoy nga apostol nga iyararawanda ken Jehova.​—Ara 8:9-24.

9. Agkurkurti iti lalat iti Joppe nga iti balayna iti igid ti baybay ti nakasangailian ni apostol Pedro iti sumagmamano nga aldaw idi 36 K.P.​—Ara 9:43; 10:6, 17, 32.