TADMOR

Maysa a lugar iti let-ang nga adda dagiti patakder nga imbangon sadiay ni Solomon sumagmamano a tiempo kalpasan ti 1017 K.K.P. (2Cr 8:1, 4) Kadawyan a maikunkuna a ti Tadmor ket isu ti siudad a pagaammo dagiti Griego ken Romano kas Palmyra. Dagiti rebbana ket adda iti maysa a nadam-eg a disso iti makin-amianan nga igid ti Desierto ti Siria agarup 210 km (130 mi) iti amianan a daya ti Damasco. Ti maysa a kabangibangna a purok ket aw-awagan pay laeng dagiti Arabo iti Tudmur. No pudno nga isu dayta ti Palmyra, mabalin a nagserbi ti Tadmor kas garison a siudad tapno maidepensa ti adayo a makin-amianan a beddeng ti pagarian ni Solomon ken kas napateg a pagsardengan ti sangkakuyogan a managbiahe.​—Kitaenyo ti TAMAR Num. 4.