TARTAN

Ipasimudaag ti Asirio a sursurat a ti titulo a Tartan ket tumukoy iti maysa nga opisial a nangato ti saadna, nalabit sumaruno laeng iti ari. Maipapan iti urnos dagiti titulo kadagiti listaan ti nagan ken sumario ti naaramidan dagiti nagturay iti Asiria, kunaen ni James B. Pritchard, editor ti Ancient Near Eastern Texts (1974, p. 274): “Idi agangay, ti saad ti opisial iti uneg ti hirarkia ti nagibasaran ti panagsasaganad, a ti kangatuan nga opisial (tartanu) ket sumaruno a mismo iti ari, idinto ta ti napapateg nga opisial ti palasio . . . ken dagiti gobernador dagiti kangrunaan a probinsia ket nasayaat ti panagsasarunoda.” (Kitaenyo ti KRONOLOHIA [Dagiti listaan ti eponimo (limmu)].) Kastoy ti mabasa iti maysa a paset ti kitikit ni Ari Asurbanipal ti Asiria, nga adda itan iti British Museum: “Nakaungetak unay maigapu kadagitoy a pasamak, simged ti kararuak. Inayabak ti opisial a turtan, dagiti gobernador, ken kasta met dagiti katulonganda ket intedko a dagus ti bilin.”​—Ancient Near Eastern Texts, p. 296.

Imbaon ni Ari Senaquerib ti Tartan a kadua ti dadduma pay nga opisial, agraman ti Rabsaque, ti panguluen nga agaw-awit iti kopa ti ari a nagakem kas pannakangiwat, tapno idanonda iti Jerusalem ti maudi a gundaway a sumuko. Mabalin a nangatngato ti saad ti Tartan gapu ta isu ti umuna a nailanad. (2Ar 18:17, 28-35) Maysa a Tartan ti imbaon ni Ari Sargon II ti Asiria a manglakub iti siudad ti Asdod, idi kaaldawan ni mammadto Isaias.​—Isa 20:1.